Փաստ ինֆո

«Օրինաց երկիր» խմբակցությունը մասնակցեց «Բարգավաճ Հայաստան» խմբակցության անդամ Վարդան Օսկանյանին անձեռնմխելիությունից զրկելու քվեարկությանը, քանի որ իր համար կարևոր է հասկանալ, թե ինչ է ուզում իրավապահ մարմինը, ինչպիսի խնդիրներ կան «Սիվիլիթաս» հիմնադրամում և ինչու չեն համընկնում հիմնադրամի  ղեկավարի և իրավապահ մարմինների կարծիքները: Այս մասին հոկտեմբերի 5-ի ճեպազրույցում հայտնեց «Օրինաց երկիր» խմբակցության ղեկավար Հեղինե Բիշարյանը: Նա հավելեց. «Քանի որ մեր գործընկերոջ հետ կապված ձեռբակալման կամ այլ որևէ լուրջ մոտեցում չկար, մենք ընդամենը, որպես խմբակցություն և կոալիցիոն գործընկեր, քննարկել ենք այդ խնդիրը և գտել ենք, որ պետք է տալ հնարավորություն,  որպեսզի իրավապահ մարմինները ճշտեն առկա խնդիրները»: «Օրինաց երկիր» խմբակցության ղեկավարը համոզմունք հայտնեց, որ Վ. Օսկանյանը որևէ խնդիր չի ունենալու, որովհետև, որքան ճանաչում են իրեն, «բավականին պարկեշտ անձնավորության տպավորություն է թողել»: «Առավել ևս, որ իր ելույթից հետո մեզ մոտ տպավորություն առաջացավ, որ որևէ լուրջ խնդիր չկա»,-ասաց Հ.Բիշարյանը:

***

«Ժառանգություն» խմբակցության ղեկավար Ռուբիկ Հակոբյանի կարծիքով, Վ.Օսկայանին անձեռնմխելիությունից զրկելու հարցով «այս իշխանությունը, ցավոք սրտի, շարունակեց  այն տխուր ավանդույթները, որոնք արդեն մի քանի անգամ ԱԺ-ում կրկնվել են և որոնք մշտապես վարկաբեկել են կամ հարվածել մեր պետության հեղինակությանը»: Ըստ պատգամավորի, այս բնույթի հարցերի օրակարգում ընկած է երեք օրինաչափություն:  Առաջին` սովորաբար իշխանությունը խորհրդարան է մտնում պատգամավորին զրկելու հարցով կամ նախագահական ընտրություններից առաջ, կամ դրանցից հետո: Երկրորդ` անձեռնմխելիությունից զրկում են բացառապես ընդդիմադիր քաղաքական գործիչներին: Երրորդ` մշտապես նման դեպքերում տուժել է մեր պետությունը, պետության հեղինակությունը: Ըստ նրա, մինչ այժմ «չգերազանցված նախադեպը մնացել է 1996թ.-ի սեպտեմբերի 26-ի դեպքը, երբ նախագահական ընտրություններից հետո ժողովուրդն ընդվզում էր կեղծիքների դեմ, երբ նախագահ չէր ընտրվել, բայց խորհրդարան մտավ նախագիծ, որով ութ ընդդիմադիր գործիչներ, քաղաքական դեմքեր զրկվեցին անձեռնմխելիությունից և հիմնական մասն ուղարկվեց բանտ»: «Նույն տրամաբանության մեջ ես դիտում եմ նաև 2008թ.-ի մարտի 4-ը, երբ պատգամավորներին զրկեցին անձեռմխելիությունից, որոնք նույնպես ընդդիմության ներկայացուցիչներ էին»,-ասաց նա:

***

«ՀՅԴ» խմբակցության քարտուղար Աղվան Վարդանյանն էլ հայտնեց, որ  Վ.Օսկանյանի հարցում խմբակցության համար «քաղաքական ենթատեքստը  նախագահական ընտրություններից առաջ ակնհայտ է, քաղաքական հետապնդման նշաններն ակնհայտ են»: Դաշնակցական պատգամավորը նշեց, որ «այստեղ հետաքրքիր մի էպիզոդ» կա. «Բարգավաճ Հայաստան» կուսակցությունը հայտարարեց, որ բոյկոտում է այս քառօրյան և լքեց ԱԺ դահլիճը: Նրան հետաքրքրում է, թե «ինչ են անելու շարունակության մեջ», վերադառնալու են ԱԺ, թե ոչ: Սա, ըստ նրա, կարող է նոր զարգացումների  հանգեցնել:

***

«ՀՀԿ» խմբակցության ղեկավար Գալուստ Սահակյանն էլ անդրադառնալով Եվրոպայի խորհրդի Խորհրդարանական վեհաժողովի Լիբերալ-դեմոկրատների խմբում ԲՀԿ պատգամավորների կողմից Վ.Օսկանյանի խնդիրը ներկայացնելուն և հարցը ԵԽԽՎ-ում ավելի լայն քննարկման թեմա դարձնելու մտադրությանը, ասաց. «Թույլ գործոն եմ համարում դա, բայց ճչացող, որովհետև այդ նույնը կարող էին կազմակերպել սեփական ժողովրդի Ազգային ժողովում»: Ըստ նրա, մինչդեռ «փաստորեն հիմնական բեռն իր վրա վերցրեց Վարդան Օսկանյանը»: «ՀՀԿ» խմբակցության ղեկավարի համոզմամբ, «Եվրախորհրդում կասեն, թե որտեղ կասեն», դա իրավական հարց է: «Կարծում եմ, իրավական հարթությունում մեր ժողովրդի համար լրիվ ապացուցված վերջաբան կունենա: Մի ժամանակ էլ Տիզբոն էին գնում, հայտարարություններ անում, դրա համար էլ երկիրը կործանեցին»,-նշեց Գ.Սահակյանը` հավելելով. «Իբրև թե եվրոպացիներն այնքան վճռական են Վարդան Օսկանյանի և «Բարգավաճ Հայաստան»-ի խնդիրներով, որ հանկարծ լուծումները կարելի է որոնել այլ ափերում»: Նրա մատուցմամբ, «սենսացիոն ոչինչ չկա, շատ սովորական երևույթ է, և հասարակությունն էլ որոշ ժամանակ հետո ակնհայտորեն կհանգստանա այդ երևույթի առումով»: