Փաստ ինֆո

Հոկտեմբերի 4-ի նիստի ընթացքում Կառավարությունը բացասական եզրակացություն է տվել ՀՀ Ազգային ժողովի պատգամավորների` օրենսդրական նախաձեռնության կարգով ներկայացրած «Չեռնոբիլի ատոմային էլեկտրակայանի և այլ միջուկային աղետներից տուժած քաղաքացիների սոցիալական պաշտպանության մասին», «Հաշմանդամների սոցիալական պաշտպանության պետական քաղաքականության մասին», «Նորաստեղծ ընտանիքներին միանվագ դրամական օգնություն տրամադրելու մասին» օրենսդրական նախաձեռնություններին:

Ինչպես կառավարության նիստում նշեց Աշխատանքի և սոցիալական հարցերի նախարար Արտեմ Ասատրյանը «Չեռնոբիլի ատոմային էլեկտրակայանի և այլ միջուկային աղետներից տուժած քաղաքացիների սոցիալական պաշտպանության մասին» օրենքի նախագծի վերաբերյալ եզրակացությունը բացասական է, քանի որ աղետի վերացման հետևանքներին մասնակցած անձանց հիմնական մասը «Զինծառայողների և նրանց ընտանիքի անդամների սոցիալական ապահովության մասին» օրենքով օգտվում են արտոնություններից, այդ թվում նաև քաղաքացիական անձինք օգտվում են բժշկական օգնության և սպասարկման հետ կապված արտոնություններից: «Այս նախագծի ընդունմամբ 627 անձանց, ովքեր հաշվառված են հկ-ների կողմից, լրացուցիչ արտոնություն է առաջարկվում, որի տարեկան ծախսը կկազմի շուրջ 142.8 մլն դրամ»:

«Հաշմանդամների սոցիալական պաշտպանության պետական քաղաքականության մասին» օրենքի նախագծի վերաբերյալ Արտեմ Ասատրյանը նշեց, որ ներկայումս նախարարության կողմից մշակվել է և նոյեմբերին կառավարության քննարկմանը կներակայացվի նոր օրենքի նախագիծ՝ կապված հաշմանդամների սոցիալական պաշտպանության հետ: «Այն խնդիրները, որոնք արծարծվել են նախագծում, լիարժեք լուծումներով ավելի ամբողջական արտացոլում են գտել նոր նախագծում: Այդ պատճառով այս պահին ոչ նպատակահարմար է այս օրենքի նախագծի ընդունումը»,- նշեց Ա. Ասատրյանը:

«Պետական կենսաթոշակների մասին» օրենքներում փոփոխություններ կատարելու օրինագծերի վերաբերյալ Աշխատանքի և սոցիալական հարցերի նախարարը նշեց, որ «Չստացված կենսաթոշակի գումարը երեք տարվա փոխարեն ներկայումս մեկ տարվա ժամանակահատվածով է սահմանափակված, առաջարկվում է կրկին վերականգնել երեք տարվա դրույթը: Կառավարության եզրակացությամբ նախագիծը չի բխում սոցիալական պաշտպանության ոլորտում կառավարության քաղաքականության սկզբունքներից, որի համաձայն՝ պետական բյուջեից սոցիալական ապահովությանն ուղղված միջոցները պետք է տրամադրվեն ըստ առաջնահերթությունների՝ ելնելով ՀՀ քաղաքացիների՝ ՀՀ-ում գտնվելու հանգամանքից»,- նշեց Ա. Ասատրյանը:

«Նորաստեղծ ընտանիքներին միանվագ դրամական օգնություն տրամադրելու մասին» օրենքի նախագծի վերաբերյալ Ս. Ասատրյանը նշեց, որ կառավարությունը կարևորում է երիտասարդ ընտանիքներին աջակցելու խնդիրները: «Բայց կարծում ենք՝ նորաստեղծ ընտանիքներին միանվագ դրամական օգնության տրամադրումն անհրաժեշտ է իրականացնել «Սոցիալական աջակցության մասին» օրենքի համապատասխան դրույթների համաձայն ամրագրված հասցեականության սկզբունքով, ըստ որի՝ սոցիալական ծառայությունները տրամադրվում են իսկապես դրա կարիքն ունցող անձանց, այս պարագայում՝ նորաստեղծ ընտանիքներին: Նախագծում առաջարկվում է հստակեցնել կարիքավորության աստիճանի հետ կապված խնդիրները: Այս տեսքով օրենքի նախագծի ընդունումը համարում ենք ոչ նպատակահարմար»,- նշեց Ա. Ասատրյանը:

Նշենք, որ այսօրվա նիստում Կառավարությունը բացասական եզրակացություն է տվել նաև «Արտադպրոցական կրթության մասին», «Մեծահասակների կրթության մասին» ՀՀ օրենքների նախագծերի, «Եկամտային հարկի մասին», «Պետական կենսաթոշակների մասին» օրենքներում փոփոխություններ կատարելու օրինագծերի վերաբերյալ։