Փաստ ինֆո

ՀՀ կառավարությունը վերջին երկու-երեք ամսում ընդունել է սիրիահայերին վերաբերող առնվազն 12 որոշում. պարզեցրել, զրոյացրել է բոլոր կարգի վճարները: Այդ մասին Ազգային ժողովի հոկտեմբերի 4-ի նիստում հայտնեց ՀՀ սփյուռքի նախարար Հրանուշ Հակոբյանը` համեմատության համար նշելով, որ Իրաքի 2001-2003թթ. դեպքերի ժամանակ կառավարությունը նման մեկ որոշում անգամ չի ընդունել:

Ըստ նախարարի՝ որպեսզի ՀՀ քաղաքացիություն ընդունած մեկ ընտանիքը գար Հայաստան և ստանար իր անձնագրերը, մոտավորապես 5 հազար դոլար պետք է ծախսեր` ճանապարհածախսի, առնվազն մեկ շաբաթ մնալու համար: Պարզեցվել է նաև վիզաների ստացման կարգը. սիրիահայերը նախկինում վիզաները պետք է ստանային միայն ՀՀ հյուպատոսությունում կամ դեսպանատանը, այսօր ստանում են ՀՀ սահմանին:

Նշվեց նաև, որ պոլիկլինիկական, շտապօգնության ծառայություններն ամբողջությամբ անվճար են: Քաղաքապետարանը լուծել է նաև առանց վարձավճարի երեխաների մանկապարտեզ հաճախելու խնդիրը: Բնականաբար` անվճար է նաև միջնակարգ կրթությունը:

Երկուշաբթի օրվանից կգործի դպրոցական սիրիական ծրագիրը, որովհետև նրանցից շատերը հեռահար ցանկություն ունեն վերադառնալ Սիրիա, այդ իսկ պատճառով ցանկանում են սովորել արաբերենով:

Հ. Հակոբյանը նշեց, որ այդուհանդերձ կրթական առումով կան ուսանողների հետ կապված որոշ խնդիրներ: Նախապատրաստական և բուհական մյուս ծրագրերում վարձավճարները հավասարեցվել են ՀՀ քաղաքացիների վճարին: «Կարծում եմ` այստեղ մենք անելիքներ ունենք. գտնել բարերարներ, օգնել, զիջել, որովհետև կան ուսանողներ, գոնե այս պահին իմ ձեռքի տակ 21 դիմում կա, որոնք ի վիճակի չեն վճարելու»,-հայտնեց նախարարը:

Նա տեղեկացրեց նաև, որ սիրիահայերի համար մի քանի մասնագիտական կազմակերպություններ իրականացնում են իրավական խորհրդատվական ծառայություններ: «Խմբավորել ենք սիրիահայերին` ըստ մասնագիտությունների, և համապատասխան նախարարություններին ուղարկել տվյալ մասնագետների ցանկերը` նրանց աշխատանքի տեղավորելու նպատակով»,-ասաց Հ.Հակոբյանը` ընդգծելով, որ այսօր թիվ մեկ խնդիրն աշխատանքի տեղավորումն է: «Սիրիահայերը, որպես կանոն, սովոր են ինքնուրույն աշխատանքի, իրենք սովոր չեն ինչ-որ մեկի մոտ աշխատելու»,-նշեց նա:

Հ.Հակոբյանը հայտնեց նաև, որ մի շարք բարեգործական կազմակերպությունների հետ, որոնք «պատրաստ են այս կամ այն հոգսը վերցնել իրենց վրա», ունեն կոնկրետ ծրագրեր: Օրինակ, կարիքավորներին ձմեռային հագուստի, կոշիկի տրամադրում: «Որպեսզի նախարարությունը չմտնի նման խնդիրների մեջ, մենք համախմբել ենք, սիրիահայերից ստեղծել ենք հասարակական կազմակերպություն, որը շուտով գրանցում կստանա ՀՀ արդարադատության նախարարությունում: Ես այն կարծիքի եմ, որ բոլոր օգնությունները պետք է իրականացնենք այդ կազմակերպության միջոցով: Թող իրենք որոշեն` ում և ինչքան են բաժանում: Նախարարությունը պետք է հեռու մնա նման խնդիրներից, բայց նախարարությունը պետք է ակտիվորեն դիմելով նաև այլ կազմակերպությունների, կառույցների, օգնի այդ կազմակերպությանը, որովհետև մենք փորձում ենք նաև տվյալների ամբողջական բանկ ստեղծել»,-նշեց ՀՀ սփյուռքի նախարարը:

Նա հայտնեց, որ Սփյուռքի նախարարությունում դեռևս ապրիլ ամսից պայմանագրային սկզբունքով աշխատանքի է վերցրել երկու սիրիահայերի, որոնց շնորհիվ այսօր արաբական մամուլը և ընդհանրապես տեղեկատվությունը շատ արագ հասու է դառնում:

Լուսանկարը՝ hayernaysor.am կայքից