Փաստ ինֆո

Հոկտեմբերի 12-ին Երևանում կայանալիք հայ-ռուսական միջկառավարական նիստում հայկական կողմը մեկ անգամ ևս ուշադրություն կհրավիրի Հայաստանի տարածքում Ռուսաստանի Դաշնային միգրացիոն ծառայության կողմից «Համերկրացիներ» ծրագրի իրականացման անթույլատրելիության վրա: Այս մասին Ազգային ժողովի հոկտեմբերի 3-ի նիստում հայտնեց ՀՀ վարչապետ Տիգրան Սարգսյանը` ի պատասխան «Ժառանգություն» խմբակցության անդամ, նախկին արտգործնախարար Ալեքսանդր Արզումանյանի հարցի:

Ըստ պատգամավորի, այս ծրագիրն իրականացվում է արտասահմանում բնակվող համերկրացիների ՌԴ-ում վերաբնակեցման պետական ծրագիր: Այն ստորագրած է ՌԴ նախագահի կողմից 2006թ.-ին և վերջերս երկարաձգվել է մի քանի տարով: Համաձայն ՌԴ օրենքի, համերկրացիներ են համարվում բոլոր այն անձինք կամ նրանց ժառանգները, որոնք պատկանում են այն ժողովուրդներին, որոնք պատմականորեն բնակվել են Ռուսաստանի տարածքում, որոնց նախնիները ապրել են ԽՍՀՄ-ում, Ռուսական կայսրությունում, ՌԽՍՀ-ում, ՌԴ-ում:

Արզումանյանը հայտնեց նաև, որ վերջին 4 տարում այս ծրագրին դիմել է շուրջ 20 հազար հայաստանցի, որոնցից վերաբնակչի կարգավիճակով ՌԴ մեկնել է մոտ 1,5 հազարը: Տարեսկզբից ի վեր ՌԴ միգրացիոն ծառայության աշխատակիցները յուրաքանչյուր ամիս երկու օր այս ծրագրով հետաքրքրվողներին ընդունում են Գյումրիում: Ծրագրին մասնակցող ՀՀ քաղաքացիները պետք է հրաժարվեն ՀՀ քաղաքացիությունից և ընդունեն ՌԴ քաղաքացիություն:

ՀՀ վարչապետը վերահաստատեց, որ Հայաստանի կառավարությունն այս խնդրի կապակցությամբ իր մտահոգությունն արդեն իսկ հայտնել է: «Այս հարցը քննարկվել է մեր ռուս գործընկերների հետ բոլոր ատյաններում, այդ թվում նաև` միջկառավարական հանձնաժողովների նիստերում: Մեր քաղաքական դիրքորոշումը հետևյալն է. Ռուսաստանի միգրացիոն ծառայության կողմից իրականացվող այս պետական ծրագիրը ՀՀ-ում այն ձևով և այն ֆորմատով, որ իրականացվում է այլ հանրապետություններում, մեզ համար ընդունելի չէ: Մենք համաձայնություն չենք տվել մեր Ռուսաստանի գործընկերներին, որ այդ ծառայությունն իր գործունեությունը ծավալի ՀՀ-ում»,-հայտարարեց Տ.Սարգսյանը:

Ըստ վարչապետի, այդ դիրքորոշումը հայտնի է Ռուսասատանի քաղաքական ղեկավարությանը, և հայկական կողմը լիահույս է, որ ՀՀ-ի դեպքում այդ ֆորմատը չի գործի: Տ.Սարգսյանը հայտնեց նաև, որ եթե ՀՀ քաղաքացին ցանկանում է մեկնել ՌԴ, ապա այդ գործառույթը կարելի է կազմակերպել դիվանագիտական խողովակներով, դեսպանատան աշխատակիցների միջոցով, ինչպես եղել է նախկինում: «Բայց ՀՀ-ում ծավալել այդպիսի գործունեություն, մեր կարծիքով, անթույլատրելի է, և մենք մեր պաշտոնական տեսակետը հայտնել ենք, այդ թվում նաև վերջերս Հայաստան այցելած ՌԴ նախագահի խորհրդական Լևիտինին: Մեր ռուս գործընկերները մեր փաստարկներն ընդունում են և սովորական միգրացիոն գործառույթներ կազմակերպելու հարցում, ես համոզված եմ, մենք կգանք համաձայնության, բայց ՀՀ-ից այդպիսի մեծածավալ արտագաղթ կազմակերպելու գործառույթները Հայաստանում կբացառվեն»,-ընդգծեց ՀՀ վարչապետը: