Փաստ ինֆո

«Պետական տուրքի մասին» ՀՀ օրենքի 9-րդ հոդվածի համաձայն՝ առաջին ատյանի դատարաններ տրվող հայցադիմումների, դիմումների ու գանգատների, դատարանի դատական ակտերի դեմ վերաքննիչ և վճռաբեկ բողոքների համար, ինչպես նաև դատարանի կողմից տրվող փաստաթղթերի պատճեններ (կրկնօրինակներ) տալու համար պետական տուրքը գանձվում է հետևյալ դրույքաչափերով.

Հայցադիմումների և որպես վեճի առարկայի նկատմամբ ինքնուրույն պահանջներ ներկայացնող երրորդ անձ գործին մասնակցելու մասին դիմումների համար`
•գույքային պահանջով հայցագնի երկու տոկոսի չափով, բայց ոչ պակաս 150000 դրամից,
•ոչ գույքային պահանջով՝ 4000 դրամ,
•իրավաբանական անձանց սնանկ ճանաչելու դիմումների համար՝ 500 հազար դրամ,
•քաղաքացիներին սնանկ ճանաչելու դիմումների համար՝ 100 հազար դրամ:

Հատուկ վարույթի գործերի վերաբերյալ դիմումների համար գանձվում է`    
•անչափահասին լրիվ գործունակ ճանաչելու համար՝ 1000 դրամ,
•այլ դիմումների համար՝ 3000 դրամ:

Իրավաբանական նշանակություն ունեցող փաստերի հաստատման մասին դիմումների համար գանձվում է պետական տուրք՝ 2000 դրամի չափով:

Ըստ ներկայացնողի և օրդերային կորցրած արժեթղթով հավաստված իրավունքները վերականգնելու մասին դիմումների համար՝ գանձվում է 1000 դրամ, որպես պետական տուրք:

Արբիտրաժային տրիբունալների վճիռների հարկադիր կատարման կատարողական թերթ տալու մասին դիմումների համար` որպես պետական տուրք գանձման ենթակա գումարի չափը 4000 դրամ է:

Դատարանի դատական ակտերի դեմ վերաքննիչ բողոքների համար գանձվում է`    
•գույքային պահանջի գործերով վերաքննիչ բողոքում նշված վիճարկվող գումարի 3 տոկոսի չափով, իսկ եթե վիճարկվում են առաջին ատյանի դատարանի կողմից բավարարված կամ չբավարարված պահանջներն ամբողջությամբ կամ բավարարված կամ չբավարարված պահանջները չեն վիճարկվում, ապա առաջին ատյանի դատարան հարուցված և բողոքարկվող հայցի հայցագնի 3 տոկոսի չափով:
•ոչ գույքային բնույթի պահանջի գործերով՝ 10 000 դրամ,
•հատուկ վարույթի գործերով՝ 8000 դրամ:

Դատարանի դատական ակտերի դեմ բերված վճռաբեկ բողոքների համար գանձվում է պետական տուրք`    
•գույքային պահանջի գործերով՝ հայցագնի 3 տոկոսի չափով, բայց ոչ պակաս 10000 դրամից և ոչ ավելի 1 մլն դրամից,
•ոչ գույքային բնույթի պահանջի գործերով՝ 20 000 դրամ,
•հատուկ վարույթի գործերով՝ 10 000 դրամ:

Ավելացնենք նաև, մոր նույն օրենքի համաձայն՝ դատարանի վճռի, դատավճռի, դատարանի որոշման պատճենը (կրկնօրինակը) գործի քննությանը մասնակցող կողմերի կամ այլ անձանց գրավոր դիմումի համաձայն տալու համար    գանձվում է պետական տուրք 500 դրամ և պատրաստված յուրաքանչյուր էջի համար` 150 դրամ:

Գործին մասնակցող անձանց հայցադիմումին կից փաստաթղթերի պատճենները գործի քննությանը մասնակցող կողմերի կամ այլ անձանց գրավոր դիմումի համաձայն տալու համար գանձվում է պետական տուրք 200 դրամի և պատրաստված յուրաքանչյուր էջի համար` 100 դրամի չափով:

Դատական նիստի համակարգչային ձայնագրման կրիչի բնօրինակից պատճենահանված կրիչ տալու համար՝ պատրաստված յուրաքանչյուր կրիչի(կոմպակտ լազերային սկավառակի) համար գանձվում է պետական տուրք բազային տուրքի չափով:

Ավելացնենք նաև, որ նույն օրենքի 8-րդ հոդվածի համաձայն՝ պետական տուրքի դրույքաչափերը սահմանվում են գնահատման ենթակա գույքի արժեքի կամ սույն օրենքով սահմանված բազային տուրքի նկատմամբ, իսկ բազային տուրքի չափ է սահմանվում 1000 դրամը: