Փաստ ինֆո

«Առաջին հայացքից տարօրինակ վիճակ է ստեղծվել Հանթսմանի, կամ «Սիվիլիթասի» երկու միլիոն դոլարի շուրջ: Ո’չ փող ուղարկողը և ոչ էլ ստացողը չեն բողոքում, որ գումարը մնացել է Օսկանյանի մոտ: Ինչո՞ւ, որովհետև այն իրականում ուղղված էր հենց Օսկանյանին` հենց իր քաղաքական ծրագրերը սպասարկելու համար, իսկ սրտաճմլիկ խոսակցությունները բարեգործության, ազատության ու քաղաքացիական հասարակության մասին ընդամենը ծխածածկույթ են շատ ավելի հեռու գնացող նպատակների համար»,-Ազգային ժողովի հոկտեմբերի 2-ի հայտարարությունների ժամին հայտարարեց ԱԺ «ՀՀԿ» խմբակցության անդամ ՍԻՄ նախագահ Հայկ Բաբուխանյանը:

Պատգամավորը մի շարք հարցադրումներ արեց, «թե ինչո՞ւ, ի՞նչ նպատակով, ի՞նչ ծառայությունների դիմաց, Հանթսմանի մորմոնական փողերը տրվեցին հենց Օսկանյանին և ինչո՞ւ այդպիսի բարդ սխեմայով»: Նա ընդգծեց, որ «Սիվիլիթաս»-ը առատորեն ֆինանսավորվում էր ոչ միայն տարբեր կազմակերպությունների, այլև` արտասահմանյան պետական աղբյուրներից: «Ի՞նչն է պատճառը, որ օտար պետությունների կառավարությունները միահամուռ միլիոնավոր դոլարներ էին ներարկում հենց Օսկանյանի «Սիֆիլիթասի» մեջ, դրանով իսկ խախտելով ԶԼՄ-ների ու քաղաքական դաշտում ազատ մրցակցության սկզբունքը»,-նշեց Հ.Բաբուխանյանը:

Նրա մատուցմամբ, հունիսի 14-ին  ՀՀ-ում ԱՄՆ դեսպան Ջոն Հեֆֆերնն իր հրապարակային ելույթներով կոպտորեն միջամտել է Վ.Օսկանյանի հետ կապված «ծանր հանցագործության հետաքննությանը, միաժամանակ խրախուսելով գործով որպես վկա անցնող Վարդան Օսկանյանի և «Սիվիլիթաս» հիմնադրամի պաշտոնատար անձանց` հետաքննությանը խոչընդոտելու և այն քաղաքական շահարկման առարկա դարձնելու ջանքերին»:

«Ի՞նչն է պատճառը, որ օտարերկրյա դիվանագետները տանիքի տակ են առել իրենց կողմից ֆինանսավորվող քաղաքական գործչին: Այս ամենի պատասխանը կարելի է գտնել Վարդան Օսկանյանի ս.թ. ապրիլի 22-ի ելույթում, որտեղ նա ուղղակիորեն կոչ է արել Հայաստանում իրականացնել լիբիական տարբերակը, այսինքն` զինված հեղաշրջում ՆԱՏՕ-ի հովանու ներքո: Եթե սրան գումարենք նաեւ Մեղրիի վերաբերյալ Օսկանյանի ծրագրերը, ապա ամեն ինչ ակնհայտ է դառնում, թե հատկապես, որ քաղաքական պատվերին և որ ծրագրի շրջանակներում էր տրամադրվում վերոհիշյալ ֆինանսավորումը: Այս կապակցությամբ, ՍԻՄ կուսակցությունը երկրի ազգային անվտանգությունը պաշտպանելու համար, հրատապ անհրաժեշտություն է համարում ընդունել օրենք օտարերկրյա գործակալների մասին»,-հայտարարեց Հ.Բաբուխանյանը: