Փաստ ինֆո

Որքա՞ն ժամանակում և ո՞ր իրավունքներն ու պարտականություններն են գրավոր ծանուցվում ձերբակալվածին:

Թաթուլ Պետրոսյան
ՀՀ ոստիկանության իրավաբանական վարչության պետ.

- Ձերբակալված կասկածյալի իրավունքներն ու ազատությունները նախատեսված են քրեական դատավարության օրենսգրքի 63-րդ հոդվածով, բայց եթե ենթաօրենսդրական ակտի մասին ենք խոսում, այստեղ խոսքը հատկապես վարչական կարգով ձերբակալված անձի կամ նրան բերելու մասին է:

Այս տեսանկյունից կարևոր է 2007թ.հունիսի 14-ին  ՀՀ կառավարության կողմից ընդունված 818 որոշումը, որտեղ նախատեսված են անձի իրավունքների և ազատությունների սահմանափակումից բխող ծանուցման ենթակա իրավունքների ու ազատությունների ցանկը և ծանուցման կարգը:

Կառավարության հիշյալ որոշման համաձայն՝ անձին նրա իրավունքներն ու ազատությունները պարզաբանվում են և բանավոր, և գրավոր: Եթե նա կատարել է վարչական իրավախախտման որևէ դեպք, ապա նրան բանավոր կարգով ծանուցվում են նրա իրավունքները: Սկզբունքորեն առաջին հերթին ոստիկանության ծառայողը նախ ներկայանում է նրան՝ նշելով իր պաշտոնը, կոչումը և տեղում, պարզաբանելով նրա կողմից թույլ տրված վարչական իրավախախտումը, բացատրում է և պարզաբանում նրա իրավունքները:

Ոստիկանության բաժին բերելու պահից արդեն բանավոր կերպով տրված պարզաբանումները արձանագրվում են, միաժամանակ ոստիկանությունում նրան տրվում է իր իրավունքների վերաբերյալ համապատասխան ցանկ:

Այդ պահից, որպես իրավախախտում թույլ տված անձ, նա կարող է իմանալ՝ ո՞րն է իր թույլ տված իրավախախտման բովանդակությունը, ինչ պատճառով և ինչ հիմքերով են իրեն  բերման ենթարկում, իմանալ կոնկրետ իրեն բերման ենթարկող անձի պաշտոնը, կոչումը,  ազգանունը:

Այնուհետև նա իրավունք ունի բացատրություններ տալ փաստաբանի ներկայությամբ, իրավունք ունի ստանալ իրավաբանական օգնություն, իրավունք ունի վարչական իրավախախտման հիմք հանդիսացող փաստաթղթերին ծանոթանալ, իրավունք ունի պահանջել փորձաքննություն կատարել և այլն: