Փաստ ինֆո

ՀՀ գլխավոր դատախազ Աղվան Հովսեփյանը եզրափակիչ ելույթում պնդեց իր միջնորդությունը՝ համաձայնություն տալ ԱԺ ԲՀԿ խմբակցության անդամ Վարդան Օսկանյանին որպես մեղադրյալ ներգրավելու համար: Նա հավաստիացրեց, որ նախաքննությունն ընթանալու է թափանցիկ ու հրապարակային, և հանրությունը պարբերաբար իրազեկվելու է նախաքննության ընթացքի և արդյունքների մասին: Գլխավոր դատախազն ընդգծեց, որ որևէ կերպ չի խախտվում Օսկանյանի անմեղության կանխավարկածի սկզբունքը՝ Օսկանյանը չպետք է ապացուցի իր անմեղությունը, այլ նախաքննական մարմինը պետք է ապացուցի նրա մեղավորությունը:

Միջնորդագրի ներկայացումն, ըստ գլխավոր դատախազի, քաղաքական որևէ երանգ չի պարունակում այն պարզ պատճառով, որ միջնորդագրով Վ. Օսկանյանին կալանավորելու հարց չի դրվում, նա չի ձերբակալվում, չի կալանավորվում, չի խոչընդոտվում նրա քաղաքական, հասարակական գործունեությունը, ազատ տեղաշարժվելու իրավունքը: «Ես գիտեմ նախաքննության մարմնի մտադրությունները, որ պատրաստ են որևէ խափանման միջոց չընտրել, նույնիսկ ստորագորություն չհեռանալու մասին»,- ասաց Ա.Հովսեփյանը՝ հավելելով, որ միջորդագրի նպատակը օբյեկտիվ, լրիվ, բազմակողմանի քննության ապահովումն է, ինչը պայմանավորված է նաև Օսկանյանի դատավարական կարգավիճակով:

Պատգամավորներից ոմանց այն հայտարարությունների կապակցությամբ, թե գործով չկա բողոք, չկա տուժող, Ա. Հովսեփյանը նկատեց, որ «նախաքննությամբ ակնհայտորեն պաշտպանվում են «Սիվիլիթաս» հիմնադրամի, նրա շահառուների, ինչպես նաև բարեգործություն կատարած Հանթսմանների շահերն ու բարի համբավը»: Նա պատահական չի համարում, որ նախաքննության արդյունքում շաբաթ օրը Օսկանյանի հաշվեհամարին մնացած 870 000 դոլարն ամբողջությամբ վերադարձվել է «Սիվիլիթաս»-ին: «Փաստորեն նախաքննության փուլում հիմնադրամին պատճառված վնասներն ամբողջությամբ վերականգնվեցին»,- ասաց նա:

Ըստ գլխավոր դատախազի՝ պատգամավորներից մեկի մատնանշած «Հիմնադրամների մասին» օրենքով իրավունք չի վերապահվում գումարները յուրացնել և ծախսել անձնական նպատակներով: Ըստ Ա. Հովսեփյանի, Վ. Օսկանյանի բանկային հաշիվներում դրամական շարժից ակնհայտ երևում է, որ 2011 հունվարի 13-ին Վ. Օսկանյանի հաշվին փոխանցվել է 1 մլն. 427 հազար դոլար՝ այդ օրվա դրությամբ այդ հաշվեհամարի մնացորդը կազմել է 0, դրանից հետո 1 մլն. 200 հազար ԱՄՆ դոլարը Վ. Օսկանյանը ձևակերպել է որպես անհատական ավանդ: Հաշվեհամարին մնացել է 227 հազար դոլար, ինչը երևում է շարժից՝ ամբողջությամբ ծախսվել է կանխիկացման կամ փոխանցումների միջոցով: 2011թ. օգոստոսի 31-ին այդ հաշվեհամարի վրա մնացել է 935 դոլար: Այդ ժամանակատվածում համեմատելով հաշվապահական փաստաթղթերի հետ, որ ներկայացվել է «Սիվիլիթաս»-ից, որևէ լումա չի փոխանցվել վերջինինս, և այդ միջոցներն ուղղվել են Օսկանյանի անձնական ծախսերի համար: Դրանից հետո, երբ արդեն բոլոր այդ գումարները ծախսվել են, Օսկանյանը իրոք ստացել է տարբեր փոխանցումներ, որը կազմել է 410 հազար ԱՄՆ դոլար: Այս գումարը մինչև 2012թ. փետրվարի 21-ը ամբողջությամբ դարձյալ ծախսվել է: Եվ դարձյալ այդ գումարից ոչ մի լումա «Սիվիլիթաս»-ին չի փոխանցվել: 1 մլն 200 հազարը, որը ձևակերպվել էր որպես ավանդ մեկ տարով, 2012թ. փետրվարի 21-ին այդ ավանդային պայմանագիրը խզվել է և այդ գումարը նստել է Օսկանյանի հաշվի վրա: Անմիջապես նույն օրը 297 հազար ԱՄՆ դոլար այդ հաշվից ուղղորդվել է այլ անձնական քարտերի վրա: «Սա բանկի կողմից ներկայացված պաշտոնական փաստաթուղթ է և աղավաղել այս փոխանցումները, կարծում եմ, ոչ ոքի չի հաջողվի՝ թեկուզ հենց քաղաքական նպատակներով»:

Օսկանյանը նշում է և բազում պատգամավորներ ելույթում նշել են, որ իր հնարամտության շնորհիվ տոկոսադրույքներ են ստացվել և օգուտ բերել «Սիվիլիթաս» հիմնադրամին: Ավանդային գումարներից ստացված տոկոսադրույքները դարձյալ մնացել են Վ. Օականյանի անձնական հաշվի վրա: Ակնհայտ է, որ սա կարող էր արվել և ավանդ ձևակերպվել «Սիվիլիթաս»-ի անունից և տոկոսադրույքները գնային հիմնադրամի հաշվին:

Ա. Հովսեփյանը նշեց, որ եթե գումարը չլիներ բարեգործական գումար, այլ նվիրատվություն, ենթակա կլիներ եկամտահարկով հարկման 103 մլն դրամի չափով: