Փաստ ինֆո

Ազգային ժողովում ՀՀ գլխավոր դատախազի միջնորդագրի քննարկման ժամանակ Վարդան Օսկանյանն իր ելույթում չհամաձայնեց գլխավոր դատախազի այն պնդման հետ, թե Հանսթմանների ընտանիքի կողմից բարեգործական նպատակներով տրամադրված գումարներն ինքը ծախսել է անձնական նպատակների համար: Ըստ Վ.Օսկանյանի, առաջին 1,2 մլն ԱՄՆ դոլարի չափով գումարը որպես ավանդ բանկում դրվել է մեկ տարով, իսկ 227 հազար դոլարն ինքն «ազատ» էր թողել` հաշվի առնելով, որ «Սիվիլիթաս» հիմնադրամին դա անհրաժեշտ է լինելու:

«Հենց այդ օրերին մենք ընդլայնվում էինք. մենք Հյուսիսային պողոտա 1 հասցեում 9-րդ հարկում էինք, ընդլայնվեցինք նաև 8-րդ հարկում: Ինտերնետ հեռուստատեսություն էինք սկսում, թերթ էինք սկսում, նոր ծրագրեր էինք անում: Սիվիլիթասը իսկապես փողի կարիք ուներ: 227 հազար դոլարը ես ազատ եմ թողել, որպեսզի ավանդը չխզենք և գումար չկորցնենք»,-հայտնեց պատգամավորը: Ըստ նրա, «Սիվիլիթաս»-ի հաշվապահությունը վարող «Պարադիգմա» ընկերության փաստաթղթերից շատ հստակ կարելի է տեսնել, որ տարեվերջին «Սիվիլիթաս»-ի կարիքները եղել են 227 հազար ԱՄՆ դոլարից 90 հազ. դոլարով ավելի:

«Ըստ «Պարադիգմա»-ի տեղեկանքի, մինչև ավանդի օրվա ավարտը ես փոխանցել եմ 227 պլյուս 90 հազար: Դա եղել է իմ անձնական հաշվից: Ուստի այստեղ որևէ կասկած չի կարող լինել այս փողերի շահարկման, այլ նպատակների  օգտագործման: Առավել ևս՝ դուք հիմա նշեցիք, որ Օսկանյանի հաշվեհամարի վրա հիմա կա, արդեն սովորել եմ, որ ես ասեմ՝ 807 հազար դոլար, տոկոսներ այնտեղ չեն ավելացել:

Բայց ուզում եմ ձեզ ասել` խորհրդակցելով խորհրդի անդամների հետ, շաբաթ օրը, հակառակ Հանթսմանի հստակ ցուցումներին, որ ես այդ գումարները կարող եմ պահել՝ ինչքան ուզեմ, մենք որոշում կայացրինք մնացած գումարները փոխանցել «Սիվիլիթաս»-ի հաշվին: Շաբաթ օրը երեկոյան ժամը 5-ին այդ փոխանցումը կատարվել է, և այս պահի դրությամբ ես «Սիվիլիթաս»-ին ո՛չ տալիք ունեմ, ո՛չ «Սիվիլիթաս»-ից առնելիք ունեմ: Եթե դուք հաշվեք դրված գումարը՝ պլյուս փոխանցվածները, հավասար է մայր գումար՝ պլյուս տոկոսներ՝ կոպեկը կոպեկին»,-վստահեցրեց Վ.Օսկանյանը, ում որպես մեղադրյալ ներգրավելու համաձյանություն տալու մասին ԱԺ-ին միջնորդագիր է ներկայացրել ՀՀ գլխավոր դատախազը: