Փաստ ինֆո

Հոկտեմբերի 2-ին Սահմանադրական դատարանը կքննարկի ՀՀ մարդու իրավունքների պաշտպանի դիմումի հիման վրա գործը: Ըստ Սահմանադրական դատարանի պաշտոնական կայքէջի, Կարեն Անդրեասյանը դիմել է «Պետական կենսաթոշակների մասին» ՀՀ օրենքի 35-րդ հոդվածի 6-րդ մասի 1-ին պարբերության և 9-րդ մասի 1-ին պարբերության, 41-րդ հոդվածի 2-րդ մասի 3-րդ կետի` ՀՀ Սահմանադրությանը համապատասխանության հարցը որոշելու խնդրանքով: ՍԴ-ն որոշել է գործի դատաքննությունը կազմակերպել բանավոր ընթացակարգով` «գործի համակողմանի քննության և կողմերի դիրքորոշումների ամբողջական բացահայտման անհրաժեշտությունից ելնելով»:

Նշենք, որ այսօր մամուլում հրապարակվել էր, թե ՍԴ-ն հոկտեմբերի 2-ին քննության է առնելու ՄԻՊ-ի դիմումի հիման վրա` «Հարկերի մասին» ՀՀ օրենքի 30.2 հոդվածի դրույթների սահմանադրականության հարցը, մինչդեռ ՄԻՊ գրասենյակից ևս` ի պատասխան «Փաստինֆո» գործակալության թղթակցի հարցի, հաստատեցին, որ քննության է առնվելու «Պետական կենսաթոշակների մասին» օրենքի որոշ դրույթների սահմանադրականության հարցը:

ՍԴ-ում վիճարկվող դրույթները վերաբերում են կենսաթոշակը անկանխիկ եղանակով ստացող կենսաթոշակառուներին: Նրանք, մասնավորապես, պարտավոր են տարեկան առնվազն մեկ անգամ պատշաճ կարգով բանկին ներկայացնել իրենց ողջ լինելու մասին ՀՀ-ում գործունեություն իրականացնող նոտարի հաստատած փաստաթուղթը կամ ներկայանալ բանկ և հայտարարություն տալ` իրենց ողջ լինելու մասին: Օրենքը սահմանում է, որ կենսաթոշակը վճարվում է նաև ՀՀ-ում գործունեություն իրականացնող նոտարի վավերացրած լիազորագիրը կենuաթոշակ նշանակող uտորաբաժանում ներկայացնելու դեպքում: Կենuաթոշակ վճարելը դադարեցվում է` լիազորագիր չներկայացնելու կամ հայտարարություն չտալու դեպքում:

Այս գործի դատաքննության օրը երկու անգամ հետաձգվել է: Նախապես այն նշանակված էր մայիսի 15-ին, սակայն ՍԴ-ի աշխատակարգային որոշմամբ հետաձգվել էր մինչև սեպտեմբերի 25-ը, հաշվի առնելով գործով զեկուցող` ՍԴ անդամ Ֆելիքս Թոխյանի առաջարկությունը: Վերջինս իր առաջարկը հիմնավորել էր այն հանգամանքով, որ օրենքի վիճարկվող դրույթների վերաբերյալ դատաքննությանը որպես պատասխանող կողմ ներգրավված Ազգային ժողովի պաշտոնական ներկայացուցիչների ՍԴ ներկայացրած բացատրություններում առկա առանձին փաստարկներ լրացուցիչ ուսումնասիրության կարիք ունեն և կարող են «էական ազդեցություն ունենալ դիմողի կողմից բարձրացված սահմանադրաիրավական վեճի բովանդակության վրա»:

Երկրորդ անգամ այս գործի դատաքննությունը ՍԴ-ն աշխատակարգային որոշմամբ հետաձգել է` հաշվի առնելով ՄԻՊ Կարեն Անդրեասյանի առաջարկությունը` պայմանավորված սեպտեմբերի 24-28-ին Հայաստանից իր բացակայելու հանգամանքով: