Փաստ ինֆո

Տեղեկատվության ազատության միջազգային օրը՝ սեպտեմբերի 28-ին, Ոստիկանությունում ՀՀ ոստիկանության պաշտոնական կայքի շնորհանդեսին ներկա էին ԵԱՀԿ երևանյան գրասենյակի ղեկավար, դեսպան Անդրեյ Սորոկինը, ՀՀ ոստիկանության պետ, գեներալ-լեյտենանտ Վլադիմիր Գասպարյանը, միջազգային և հասարակական կազմակերպությունների ներկայացուցիչներ:

«Police.am»-ը գործում է ութ տարի, վերջին անգամ այն փոփոխվել է 2010-ին:

«Լրատվամիջոցների, քաղաքացիների, տարբեր կազմակերպությունների դժգոհությունները, առողջ քննադատությունը հիմք դարձան, որ մենք փոփոխենք մեր պաշտոնական կայքը»,- նշեց ոստիկանության տեղեկատվության և հասարակայնության հետ կապերի վարչության պետ Ա. Ահարոնյանը:

Ըստ նրա՝ կայքը գործարկելու օրը պատահական չէ ընտրված. «Police.am»-ը նոր դիմագծով ներկայացնելու նպատակն է ևս մեկ անգամ վստահեցնել, որ ՀՀ ոստիկանությունը հավատարիմ է իր որդեգրած քաղաքականությանը՝ հնարավորինս թափանցիկ և հրապարակային գործունեությանը»:

Կայքի պատրաստմանն աջակցել է ԵԱՀԿ երևանյան գրասենյակը, որի կողմից հայտարարված մրցույթում հաղթող է ճանաչվել «Studio One» ընկերությունը:

«Կայքն ստեղծելիս որոշակի չափորոշիչներ ենք սահմանել, այն լրագրողների համար պետք է լինի տեղեկատվության մատչելի աղբյուր, քաղաքացիների համար՝ խորհրդատու, հաշվի են առնվել նաև կանխարգելիչ միջոցառումները»,-նշեց Աշոտ Ահարոնյանը:

Ոստիկանության տեղեկատվության և հասարակայնության հետ կապերի վարչության պետի տեղակալ, կայքի գլխավոր տնօրեն Վարուժան Բալյանը ներկայացրեց նոր կայքն իր ամբողջական տեսքով և նորություններով:

Կայքում կատարված փոփոխությունները բարձր գնահատեց ԵԱՀԿ երևանյան գրասենյակի դեսպան Անդրեյ Սորոկինը: Ըստ նրա՝ փոփոխությունները կնվազեցնեն բյուրոկրատական քաշքշուկները, կնպաստեն հասարակության վստահության ամրապնդմանը, քաղաքացիների՝ վերջին տեղեկատվություն ստանալուն:

Նա պատրաստակամություն հայտնեց հետագայում ևս համագործակցել ՀՀ ոստիկանության հետ:

ՀՀ ոստիկանապետ Վլադիմիր Գասպարյանի կարծիքով՝ կայքը որակական նոր փոփոխությունների, ավելի բարձր մակարդակի հասցնելը դեռ սկիզբն է: «Մի քանի ամիս հետո մենք ավելի խորը, ընկալելի կդարձնենք մեր գործունեությունը, ականատես կլինեք ոստիկանական միջոցառումների, օպերացիաների, այս կամ այն հանցագործությունը բացահայտելուն: Մեր նպատակն է՝ ոստիկանությունը դարձնել ընկալելի, մաքրել անարդարության, ոչ ճշմարիտ լուծումներ տալու խարանը, որ դրված է մեզ վրա: Իհարկե, կան խոչընդոտներ, չարակամություն և չարաճճիություն, բայց մենք այս ամիսների ընթացքում սովորել ենք հանդուրժել, համբերել, ժպտալ, սովորել մեր սխալների վրա»,- նշեց ոստիկանապետը:

Անդրեյ Սորոկինին պարգևատրեց մեդալով՝ համագործակցության ամրապնդման համար: