Փաստ ինֆո

«Շատ կարևոր և բովանդակալից քննարկումներ ունեցանք: Կարծում եմ` ամենակարևորն այն է, որ բանակցող թիմի և որևէ մեկի մոտ որևէ կասկած չթողեցինք, որ մենք պատրաստակամ ենք օժանդակելու Հայաստանի եվրոպական ընթացքին` ի շահ Հայաստանի քաղաքացիների, Հայաստանի Հանրապետության և Եվրոպական միության»,- սեպտեմբերի 27-ին ՀՀ կառավարությունում կայացած հանդիպումից և վարչապետի հետ երկու համաձայնագրեր ստորագրելուց հետո ասուլիսում ասել է Եվրոպական միության ընդլայնման և հարևանության քաղաքականության հարցերով հանձնակատար Շտեֆան Ֆյուլեն:

Նա ընդգծել է, որ Հայաստանում առկա են շատ դրական փոփոխություններ: «Մենք դա գնահատեցինք` լրացուցիչ 15 մլն եվրո հատկացնելով Հայաստանին` «ավելին` ավելիի դիմաց» սկզբունքի շրջանակում, Եվրոպական հարևանության քաղաքականության համատեքստում»,-ասել է ԵՄ բարձրաստիճան պաշտոնյան:

Շտեֆան Ֆյուլեն հայտնել է, որ ստորագրված համաձայնագրերով նախատեսվում է 43 մլն եվրոյի օժանդակություն Հայաստանին: Այն, ըստ նրա, կնպաստի, որպեսզի Հայաստանի հաստատությունները նախապատրաստվեն Եվրոպական միության հետ քաղաքական ասոցացմանը և տնտեսական ինտեգրմանը:

«Մենք նաև քննարկեցինք, թե ինչպես կարելի է Հայաստանի միջազգային գործընկերների ջանքերը միավորել, որպեսզի արտաքին աջակցությունը նպատակաուղղվի ազգային ամենահրատապ բարեփոխումների իրականացմանը: Ամեն անգամ, երբ նայում եմ, տեսնում եմ, որ առաջընթաց ենք արձանագրում թե՛ վիզաների դյուրացման և ռեադմիսիայի համաձայնագրերի բանակցության առումով, թե՛ այլ ոլորտներում, մասնավորապես, Ասոցացման համաձայնագրի բանակցություններում և դրա մաս կազմող` Խորը և համապարփակ ազատ առևտրի համաձայնագրի բանակցություններում»,-նշել է նա:

Ըստ ԵՄ ընդլայնման և հարևանության քաղաքականության հարցերով հանձնակատարի, այս համաձայնագրով ԵՄ-ն Հայաստանի առջև կբացի իր ներքին շուկային վերաբերող իրավական կարգավորումների զգալի մասը: «Դա կազդի բոլոր հայաստանցիների վրա, ընդ որում` կազդի լավագույնս թե՛ սպառողների պաշտպանության, թե՛ բնապահպանության, թե՛ ճանապարհների անվտանգության և այլ առումներով: Ամենակարևորն այն է, որ համաձայնագիրը վերաբերում է արժեքներին` Հայաստանում բնակվող կանանց և տղամարդկանց` ազատությունների, իրավունքների և երաշխիքների միջոցով: Համաձայնագիրը վերաբերում է այդ ներուժի լիարժեք իրագործմանը»,-ընդգծել է նա:

Շտեֆան Ֆյուլեն նշել է նաև, որ հանդիպման ժամանակ բազմաթիվ հարցեր են քննարկվել, այդ թվում` Հայաստանում աշխատող փորձագիտական խմբի և քաղաքացիական հասարակության դերը բարեփոխումների գործընթացում: Նա հույս է հայտնել, որ գնալով այդ դերն ավելի ու ավելի է կարևորվելու:

«Ամենաառաջնահերթ բարեփոխումներից մեկը ժողովրդավարության բնագավառում է: Կառավարության և ընդդիմության ներկայացուցիչների հետ քննարկելու եմ ԵԱՀԿ/ԺՀՄԻԳ-ի ներկայացրած մի շարք կոնկրետ առաջարկություններ, որոնց իրագործումը մենք կցանկանայինք տեսնել մինչև հաջորդ տարվա նախագահական ընտրությունները: Բարեհաջող ընտրություններն իսկապես կարևոր են, այլապես կընդհատվեին այն շարունակական բարեփոխումները, որոնք մենք ցանկանում ենք տեսնել, կընդհատվեր շարունակականությունը և ամբողջականությունը»,-նշել է նա:

ՀՀ վարչապետ Տիգրան Սարգսյանն էլ իր հերթին հավաստիացրել է, որ Շտեֆան Ֆյուլեի այցելությունը Հայաստան բացառիկ հնարավորություն է գնահատել կատարած աշխատանքները, բացահայտել մեր ուժեղ և թույլ կողմերը, ինչպես նաև հստակեցնել ապագա քայլերը: «Ակնհայտ է, որ այն ֆինանսական և տեխնիկական օժանդակությունը, որ այսօր տրամադրվում է Հայաստանի Հանրապետությանը և այն փաստաթղթերը, որ մենք այսօր պարոն Ֆյուլեի հետ ստորագրեցինք, հնարավորություն են տալու մեզ էապես ավելացնել մեր կառավարության կարողությունները»,-նշել է ՀՀ վարչապետը:

Տ.Սարգսյանը պարզաբանել է, որ դա վերաբերում է ինչպես ենթակառուցվածքների զարգացմանը, սանիտարական, բուսասանիտարական ոլորտի հիմնախնդիրներին, օրենսդրական բարեփոխումներին, մաքսային ընթացակարգերի կատարելագործմանը, այնպես էլ դեմոկրատական ինստիտուտների ամրապնդմանը: «Հասկանալի է, որ այս բնագավառներում դեռևս մեր կարողությունների և մեր կողմից հայտարարված նպատակների միջև կա ճեղքվածք, և Եվրամիության ֆինանսական և տեխնիկական օժանդակության ներքո այդ ճեղքվածքը մենք փորձում ենք հաղթահարել»,-նշել է ՀՀ վարչապետը` համոզմունք հայտնելով, որ փաստաթղթերի ստորագրումը, ինչպես նաև Շտեֆան Ֆյուլեի հետ բանակցությունները նոր թափ կհաղորդեն Հայաստանի և Եվրամիության ինտեգրացիոն գործընթացներին: