Փաստ ինֆո

Սեպտեմբերի 27-ին ՀՀ վերաքննիչ քրեական դատարանը՝ դատավոր Հենրիկ Տեր-Ադամյանի նախագահությամբ, հրապարակեց «Սիվիլիթաս» հիմնադրամի ներկայացուցիչ Արթուր Գրիգորյանի՝ Երևանի Կենտրոն և Նորք-Մարաշ վարչական շրջանների դատարանի որոշման դեմ բողոքի վերաբերյալ որոշումը:

Հիշեցնենք, որ վերջինս՝ դատավոր Մխիթար Պապոյանի նախագահությամբ, մերժել էր «Սիվիլիթաս»-ի դիմումը փողերի լվացման հատկանիշներով ԱԱԾ-ի կողմից քրեական գործ հարուցելու որոշումը վերացնելու մասին:

ՀՀ վերաքննիչ քրեական դատարանը որոշեց «Սիվիլիթաս» հիմնադրամի ներկայացուցիչ Արթուր Գրիգորյանի վերաքննիչ բողոքը մերժել:

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2012 թ. օգոստոսի 18-ի որոշումը քրեական գործ հարուցելու և այն վարույթ ընդունելու մասին ՀՀ ԱԱԾ քննչական վարչության պետի տեղակալ Համբարձումյանի որոշումը վերացնելու մասին «Սիվիլիթաս» հիմնադրամի ներկայացուցիչ Արթուր Գրիգորյանի բողոքը մերժելու մասին մնաց օրինական ուժի մեջ:

Հիշեցնենք, որ «Սիվիլիթաս» հիմնադրամի ներկայացուցիչ Արթուր Գրիգորյանը բողոք էր ներկայացրել Վերաքննիչ քրեական դատարան` խնդրելով բեկանել Կենտրոն և Նորք-Մարաշ վարչական շրջանների ընդհանուր իրավասության դատարանի որոշումը։ Նշենք, որ վերջինս օգոստոսի 18-ին մերժել էր փաստաբանի դիմումը և չէր վերացրել հանցավոր ճանապարհով ստացված առանձնապես խոշոր չափերով եկամուտներն օրինականացնելու (փողերի լվացում) դեպքով Ազգային անվտանգության ծառայության կողմից քրեական գործ հարուցելու մասին որոշումը։

«Սիվիլիթաս» հիմնադրամի ներկայացուցիչ Արթուր Գրիգորյանը լրագրողների հետ զրույցում նշեց, որ Վերաքննիչ քրեական դատարանի որոշումն անակնկալ չէր իր համար:

«Ակնհայտ է, որ մեր դատական համակարգը դեռ ունակ չէ դրսևորելու այն աստիճանի անկախություն, որպեսզի ԱԱԾ քննիչի որոշումը վերացնի, առավել ևս որ մենք ունենք Վճռաբեկ դատարան, որն այսօր մահակային սիստեմով բոլոր դատավորներին ստիպում է ընդունել այն որոշումները, որոնք իրենց նախադեպերին չհակասեն»,- նշեց Ա. Գրիգորյանը: Նրա խոսքով՝ դատարանի որոշումը բողոքարկելու ՀՀ Վճռաբեկ դատարան. «Եթե Վճռաբեկ դատարանի կողմից լինի որոշում վերադարձնելու մասին, ապա «Սիվիլիթաս» հիմնադրամի տնօրենի և այլ շահագրգիռ անձանց հետ կքննարկենք միջազգային ատյան ներկայացնելու հարցը»: Փոխհատուցում արդյոք կպահանջեն, հարցին ի պատասխան՝ «Սիվիլիթաս» հիմնադրամի ներկայացուցիչը նշեց, որ այս պահին դժվար է պատասխանել նման հարցի՝ «վստահորդի հետ քննարկելու և որոշելու հարց է»: Համենայնդեպս ըստ նրա՝ առավել հավանական է, որ բարոյական վնասի փոխհատուցման մասին խոսք կլինի, քանի որ «Սիվիլիթաս» հիմնադրամի բարի համբավն այս ամենի հետևանքով տուժել է:

Հարցին, թե հնարավոր համարու՞մ է, որ այս գործընթացին հաջորդի Օսկանյանին անձեռնմխելիությունից զրկելու գործընթացը, Ա. Գրիգորյանը նշեց. «Ոչինչ չեմ բացառում, հատկապես որ բազմիցս արծարծվել է դատավարության՝ քաղաքական տարրեր կրելու հարցը: Գնալով այդ համոզմունքն ավելի է ամրապնդվում»: