Փաստ ինֆո

Օրերս «Արմենիա» հեռուստաալիքով հեռարձակվող «Սուր անկյուն» հաղորդաշարի ընթացքում ներկայացվել էր տեղեկություն` ապօրինի ծառահատումների վերաբերյալ, որի շրջանակներում անդրադարձ էր արվել Լոռու մարզում ապօրինի ծառահատումներին:

Մասնավորապես շեշտվել էր, որ ապօրինի հատված փայտանյութը հիմնականում տեղափոխվում է օրինական դուրս գրված փայտանյութի փաստաթղթերով` բեռնատար ավտոմեքենաներով կամ քողարկված եղանակով` մարդատար միկրոավտոբուսներով:

Մարզի տարածքում ապօրինի անտառահատումների դեմ պայքարն ավելի արդյունավետ դարձնելու, դրանք կանխելու, իսկ կատարված ապօրինի ծառահատումների դեպքերն արագ բացահայտելու համար Լոռու մարզի դատախազը հանձնարարել է ՀՀ ոստիկանության Լոռու մարզային վարչությանը կատարել օպերատիվ միջոցառումներ, մարզի տարածքում փայտանյութի յուրաքանչյուր տեղափոխման դեպք հայտնաբերելիս հաշվառել այն, հանգամանորեն ստուգել ձեռք բերման և ներկայացված փաստաթղթերի օրինականությունը, անհրաժեշտության դեպքում նախապատրաստել նյութեր և լուծել ընթացքը:

Բացի այդ, դատախազը հանձնարարել էր համատեղ շրջայցեր կազմակերպել մարզի տարածքում գործող բոլոր փայտամշակման արտադրամասեր, ստուգել առկա փայտանյութի ձեռք բերման օրինականությունը, փաստաթղթերի իսկությունը, իսկ անհրաժեշտության դեպքում փայտանյութ իրացրած անտառտնտեսություններում բնապահպանական պետական տեսչության միջոցով ստուգում կատարել` ձեռնարկված միջոցառումների և ստացված արդյունքների մասին պարբերաբար ներկայացնելով գրավոր հաղորդում:

Միաժամանակ նկատի ունենալով, որ նույն հաղորդման ընթացքում «Էկոլուր» տեղեկատվական-հասարակական կազմակերպության նախագահի կողմից կարծիք էր հնչեցվել, թե Լոռու մարզի դատախազությունը «անտառային բիզնեսի» մասնակից է, ապա տեղեկացնենք, որ Լոռու մարզի դատախազը 2012թ. սեպտեմբերի 11-ին դիմել է նշված հասարակական կազմակերպության նախագահ Ի. Զարաֆյանին` առաջարկելով տրամադրել մարզի դատախազության, ինչպես նաեւ այլ մարմինների պաշտոնատար կամ այլ անձանց ապօրինի ծառահատումներին «մասնակից» լինելու վերաբերյալ նյութեր:

Հարցմանն ի պատասխան` 2012թ. սեպտեմբերի 25-ին դատախազությունում ստացվել է «Էկոլուր» տեղեկատվական-հասարակական կազմակերպության նախագահ Ի. Զարաֆյանի պատասխան գրությունը` նշելով, որ իր կողմից հնչեցրած հայտարարությունը հիմնավորող նյութերի ինքը չի տիրապետում.

«Մինչդեռ իմ` վերը նշված հայտարարությամբ տարածվել են ոչ կոնկրետ անձին նշանակող տեղեկատվություններ, նրանք չեն վերաբերել որոշակի փաստերի, այլ հանդիսացել են գնահատողական դատողություններ, ինչպես նաեւ չի նվաստացվել ուրիշի պատիվն ու արժանապատվությունը կամ բարի համբավը»,- ասված է պատասխանում:

ՀՀ գլխավոր դատախազություն