Փաստ ինֆո

Մինչ տարեվերջ 40 տոկոսով կբարձրացվի Խաչատուր Աբովյանի անվան Հայկական պետական մանկավարժական համալսարանի պրոֆեսորա-դասախոսական կազմի շուրջ 900 ներկայացուցիչների աշխատավարձը:

Այս մասին համալսարանի խորհրդի սեպտեմբերի 24-ին կայացած հերթական նիստում հայտնել է ՀՊՄՀ ռեկտոր Ռուբեն Միրզախանյանը: Նման հանձնարարականով հանդես էր եկել խորհրդի նախագահ, ՀՀ վարչապետ Տիգրան Սարգսյանը:

Նախորդ տարի ևս այս բուհում աշխատավարձերը բարձրացվել էին 40 տոկոսով: Հիմնական նպատակը Մանկավարժական համալսարան երիտասարդ դասախոսներին ներգրավելն է: «Փաստ է, որ երիտասարդ գիտնականների խրախուսման առաջնային ձևերից մեկը ֆինանսականն է»,-այս կապակցությամբ նկատել է Տ.Սարգսյանը:

«Մենք ցանկանում ենք, որպեսզի մանկավարժական համալսարանը, որը հաջողությամբ է իրականացնում իր բարեփոխումները, դառնա Հայաստանի առաջատար բուհերից մեկը: Երկրում այսօր իրականացնում ենք բուհական կրթության բարելավման բարեփոխումներ և հասկանալի է, որ առաջին հատվածում պետք է լինեն ուսուցիչները: Դա նշանակում է, որ մանկավարժական համալսարանը պետք է կարողանա ամբողջ կրթական ոլորտին ապահովել բարձր որակավորում ունեցող մասնագետներով, որոնք կկարողանան արմատական փոփոխություններ իրականացնել մեր կրթական համակարգում: Համոզված եմ, որ մեր երկրի առաջընթացը պայմանավորված է լինելու նաև հենց այս բարեփոխումներով»,- մասնավորապես ասել է Տիգրան Սարգսյանը:

Անդրադառնալով ուսանողներից մեկի այն դիտարկմանը, թե ներկայումս շրջանավարտը չի կարողանում գտնել աշխատանք, քանի որ գործատուն պահանջում է աշխատանքային փորձ՝ ՀՀ կրթության և գիտության նախարար Արմեն Աշոտյանը տեղեկացրել է, որ կառավարության ղեկավարի հանձնարարականով այժմ իրենք աշխատում են օրենսդրական փաթեթի վրա, որը կկարգավորի խնդիրը: Նախագծով առաջարկվելու է ուսումնառության տարիները դիտարկել որպես աշխատանքային փորձ, ինչը կհեշտացնի երիտասարդների մուտքը քաղաքացիական ծառայության և մասնավոր ոլորտ: