Փաստ ինֆո

Շիրակի մարզի քննչական բաժնի ավագ քննիչ Հովհաննես Մաթոսյանը հեռացվել է իր վարույթում գտնվող կրկնակի գողության գործի քննությունից: Ինչպես հայտնի դարձավ «Փաստինֆո» գործակալությանը, նախաքննության օրինականության նկատմամբ հսկողություն իրականացնող դատախազ, Շիրակի մարզի դատախազության ավագ դատախազ Մ. Սալոյանն աննպատակահարմար է գտել ավագ քննիչ Հովհաննես Մաթոսյանի մասնակցությունը տվյալ քրեական գործով նախաքննությանը և քննիչի վերադասին հանձնարարվել է գործով նախաքննությունը մեկ այլ քննիչի փոխանցել:

2012 թվականի հուլիսի 7-ին ոստիկանությունում հաղորդում է ստացվել քաղաքացիներ Ալբերտ Մայիլյանից և Գևորգ Քարտաշյանից իրենց բնակարաններից՝ համապատասխանաբար Ա.Մայիլյանի բնակարանից 250.000 դրամ շինարարական ապրանքներ, իսկ Գ.Քարտաշյանի տան նկուղից՝ 300.000 դրամի շինանյութեր գողանալու դեպքի առթիվ: Սակայն քրեական գործ հարուցվել է միայն վերջին դեպքով: Ավելի ճիշտ՝ քրեական գործ հարուցելու որոշման մեջ նշվել է միայն մեկ դեպքը, թեև երկու դեպքերով էլ քննությունն իրականացվել է մեկ վարույթում՝ ավագ քննիչ Հ.Մաթոսյանի կողմից: Գործը վարույթ ընդունած քննիչը, ըստ դատախազ Մ. Սալոյանի, քննությունը կատարել է թերի և խախտումներով, չի ապահովվել քրեական գործի քննության բազմակողմանիությունն ու լրիվությունը: Մասնավորապես՝ 1 ամսվա ընթացքում քննչական գործողություններ են կատարվել ընդամենը երկու օր՝ հարցաքննվել են 2 տուժողները, կասկածյալն ու վկան, ապա քննությունն ուղղակի «անշարժացել է»: Ավելին՝ պարզվել է, որ քննիչը Մայիլյանին որպես տուժող հարցաքննել է առանց նրան տուժող ճանաչելու՝ խախտելով ՀՀ քրեական դատավարության օրենսգրքի 58-րդ հոդվածի պահանջները:

Քննիչը չի փորձել պարզել անգամ, թե ինչու է տուժողներից մեկը գողության մեջ կասկածում անչափահաս Արթուրին: Ըստ դատախազի՝ խախտումներով են ընթացել նաև անչափահաս կասկածյալի հարցաքննությունը, իսկ նրա մասնակցությամբ կատարված քննչական փորձարարությունը՝ թերի: Ըստ դատախազի՝ ոչ միայն պատշաճ քննության առարկա չեն դարձվել պաշտպանի առարկությունները՝ քննչական փորձարարության վերաբերյալ, այլ նաև անհետևանք է թողնվել ընդհանրապես քրեական գործի նախաքննության ընթացքի վերաբերյալ անչափահաս կասկածյալի պաշտպանի առարկությունները: