Փաստ ինֆո

Ինչպես «Փաստինֆո»-ն տեղեկացրել էր, ՀՀ Ազգային ժողովի Էթիկայի հանձնաժողովը սեպտեմբերի 24-ի դռնփակ նիստում միաձայն որոշում է կայացրել քննության առնել քաղաքացի Վարդգես Գասպարիի դիմումը:

«Սա առաջին դիմումն է, որ Էթիկայի հանձնաժողովը պետք է ըստ էության քննարկի: Դիմումը վերաբերվում է ԱԺ պատգամավոր Սամվել Ալեքսանյանի կողմից էթիկայի կանոնները խախտելուն, և հանձնաժողովը պետք է որոշի` ինչքանով է դիմումատուի պնդումը համապատասխանում իրականությանը»,- հայտնեց հանձնաժողովի նախագահ, «Հայ ազգային կոնգրես» խմբակցության ներկայացուցիչ Նիկոլ Փաշինյանը:

«Տվյալ դեպքում չի կարելի կուսակցական կամ քաղաքական շահերով առաջնորդվել»,- ի պատասխան լրագրողների հարցերի, ընդգծեց Ն.Փաշինյանը` նկատի ունենալով, որ դիմումատուն ՀԱԿ-ի ակտիվիստներից է: «Դիմումը պետք է օբյեկտիվ, ամբողջական քննության արժանանա, և լինի եզրակացություն, որը վստահելի լինի հանրության համար»,-վստահեցրեց նա:

Դիմումի վերաբերյալ հանձնաժողովի քննարկման ընթացքում եզրակացության, որոշման նախագիծ ներկայացնելու նպատակով հանձնաժողովի ներկայացուցիչ է նշանակվել Էթիկայի հանձնաժողովում ՀՅԴ ներկայացուցիչ Արծվիկ Մինասյանը: Ակնկալվում է, որ դիմումի քննությունը ավարտին կհասցվի 30-օրյա ժամկետում: Կանոնակարգով նախատեսված է, որ անհրաժեշտության դեպքում այդ ժամկետը կարող է երկարաձգվել ևս 15 օրով:

Նշենք, որ սա, ԱԺ պատգամավորին վերաբերող, քաղաքացիներից ստացված երրորդ դիմումի քննարկումն էր: ՀՀ քաղաքացի Արթուր Զադոյանի և «Հանրային տեղեկատվություն և գիտելիքի կարիք» ՀԿ-ի` ԱԺ 3 պատգամավորներին վերաբերող նախորդ երկու դիմումների քննությունը հանձնաժողովը օգոստոսի 31-ի նիստում քննարկումների արդյունքում որոշել էր մերժել:

ԱԺ կանոնակարգ-օրենքի համաձայն, Էթիկայի հանձնաժողովի նիստերը դռնփակ են, բացառությամբ այն դեպքի, երբ դիմումում նշված պատգամավորն առաջարկում է հանձնաժողովի նիստերն անցկացնել դռնբաց: Այդ իսկ պատճառով, դիմումները նախօրոք հրապարակման ենթակա չեն, սակայն դրանց վերաբերյալ հանձնաժողովի որոշումները և եզրակացությունները հրապարակվում են և տեղադրվում ԱԺ-ի պաշտոնական կայքէջում: