Փաստ ինֆո

2. Լրագրողների խնդրանքով վարորդները չտուգանվեցին

Ճանապարհային ոստիկանությունը երեկ ժամը 16.30-ից մինչև 17.30-ն ընկած ժամանակահատվածում կազմակերպել էր «ռեյդ»: Ստուգայցի շրջանակներում լրագրողների ուղեկցությամբ ոստիկանները պատահական երթուղայիններ պետք է կանգնեցնեին, ստուգեին ուղևորների թիվը: Նպատակն էր պարզել, թե որքանով են գերբեռնված աշխատում երթուղային տաքսիները:

Pastinfo. am-ի թղթակիցը ճանապարհային ոստիկաններ Կարեն Մելքոնյանի և Գեորգի Ասչյանի ուղեկցությամբ 1357 համարի պարեկային մեքենայով շրջում էին Խանջյան փողոցով:

Մինչ Խանջյան փողոց հասնելը…

Թեև ՃՈ կազմակերպած միջոցառման նպատակն էր ստուգելու ուղևորատար փոխադրամիջոցների, մասնավորապես՝ երթուղային տաքսիների վիճակը, սակայն Pastinfo.am-ի թղթակցի ուղեկցությամբ շրջայցի մեկնարկը տրվեց ոչ երթուղային տաքսու կատարած խախտմամբ: Նալբանդյան-Մոսկովյան խաչմերուկում ականատես եղանք ոչ թույլատրելի տեղում կանգ առած մեքենայի: «68 704» Մերսեդեսի վարորդ, մոտեցեք մեքենային»: Ոստիկաններն այս հրահանգը մի քանի անգամ կրկնելուց հետո, տեսնելով, որ վարորդը չի մոտենում, կապ հաստատեցին համապատասխան ստորաբաժանման հետ, հաղորդեցին, որպեսզի էվակուատոր ուղարկեն տվյալ հասցեով՝ մեքենան հատուկ պահպանվող տարածք տեղափոխելու համար:

Ոստիկանները տեղեկացրին, որ նման դեպքերում տեսուչները կանգնում են մեքենայի մոտ մինչև էվակուատորի մոտենալը: Այս անգամ նրանք չսպասեցին, քանի որ առջևում ավելի կարևոր գործ կար՝ երթուղայինների գերբեռնվածությունը ստուգելը...

22 համարի գիծը սպասարկող երթուղայինները քիչ են ու գերբեռնված

Խանջյան փողոցում այդ ժամանակահատվածում գերբեռնված երթուղային տաքսիների շատ քիչ հանդիպեցինք: Սահմանված քանակից երկու-երեք ուղևոր ավելի տեղափոխող երթուղայինները ևս քիչ էին: Այնուամենայնիվ Pastinfo. am-ի թղթակցի ուկեկցությամբ շրջող պարեկային մեքենան «որսաց» գերբեռնված 22 համարի երթուղայինը, որտեղ ուղևորների թիվը սահմանված քանակից 7-8-ով ավելի էր:

Մինչ տեսուչներն ստուգում էին վարորդի համապատասխան փաստաթղթերը, Pastinfo.am-ի թղթակիցը զրուցեց ուղևորների հետ: «Վարորդը մեղավոր չէ, մենք ենք մի կերպ խցկվել, որպեսզի երկար չսպասենք»,- նշեցին ուղևորները: Նրանք բացատրեցին, որ 22 համարի գիծը սպասարկող երթուղայինները քիչ են, բացի այդ ուշ-ուշ են անցնում:
«Հերացի փողոցով միայն այս երթուղայինն է անցնում, իսկ ես շատ գումար չունեմ, որ երկու երթուղային փոխեմ»,- Pastinfo. am-ի թղթակցի հետ զրույցում նշեց ուղևորներից մեկը: Երթուղայինի վարորդ Մաթևոս Խաչատրյանը Pastinfo. am-ի թղթակցի հետ զրույցում բացատրեց, որ ինքն այնքան էլ չի ցանկանում գերբեռնված երթուղային տաքսի վարել, բայց. «Մեքենան կանգնեցնում եմ, որ ուղևորներն իջնեն, մեկն իջնում է, մի քանիսը բարձրանում են»:

Վարորդը համաձայնեց ուղևորների դժգոհության հետ՝ փաստելով, որ իսկապես 22 համարի գիծը սպասարկող երթուղայինները քիչ են. «Վարորդ չկա, բայց եթե երթուղայինները շատ էլ լինեն, միևնույն է՝ հիմա «Պիկ» ժամ է, առավոտյան է այսպես լինում ու երեկոյան՝ երբ աշխատանքից տուն են գնում: Այդ ժամերին երթուղայինները միշտ էլ գերբեռնված են լինում»:

Ոստիկաններն արձանագրություն չկազմեցին, միայն բանավոր հորդորեցին առաջին կանգառում բեռնաթափել մեքենան՝ ուղևորների անվտանգության համար: Կարեն Մելքոնյանի և Գեորգի Ասչյանի խոսքով՝ նման դեպքերում իրենք որպես կանոն մարդկային վերաբերմունք են ցուցաբերում. «Հասկանալով վարորդի առօրյան, ինչպես նաև հաշվի առնելով, որ իսկապես «Պիկ» ժամ է, զիջումներ ենք անում՝ տուգանելու փոխարեն բանավոր զգուշացում ենք տալիս»,- նշեցին նրանք:

Հաջորդը 99 համարի երթուղայինն էր, որին կանգնեցրինք կանգառից դուրս կանգնելու համար: Չնախատեսված վայրում կանգառ անելու դեպքում տուգանքի չափը 10 հազար դրամ է: 40 տարվա փորձ ունեցող վարորդը պատճառաբանեց, որ առջևում կանգնած ավտոբուսը խանգարեց կանգառում կանգնելուն: Ոստիկանները փորձեցին արձանագրություն կազմել. «Ձեզ տուգանք է հասնում, հարգելի վարորդ»: Տեսուչին ի պատասխան վարորդը խնդրեց այս անգամ իրեն ներել: Վարորդին միացանք նաև մենք. խնդրեցինք այս անգամ էլ չտուգանել, միայն բանավոր զգուշացում տալ:

Շրջայցին մասնակցեց և խախտումները չարձանագրեց
Լիլիթ Հովհաննիսյանը

Հեղինակ` «ՓԱՍՏԻՆՖՈ»