Փաստ ինֆո

«Միլանո» խանութի սեփականատերերից մեկի՝ «Օլիմպ» ԱԿ-ի ներկայացուցիչ, փաստաբան Տիգրան Հայրապետյանը բողոք է հղել ՀՀ արդարադատության խորհրդին:

Փաստաբանը «Pastinfo.am»-ին հայտնեց, որ բողոքում խնդրում է կարգապահական վարույթ հարուցել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գայանե Կարախանյանի նկատմամբ:

Տ. Հայրապետյանը բողոքում նշել է, որ «Օլիմպ» արտադրական կոոպերատիվը հասարակության և պետության կարիքների համար սեփականությունը օտարելու պայմանագիր կնքելուն պարտավորեցնելու պահանջի մասին հայց է ներկայացրել դատարան: Նախագահող դատավոր Գ. Կարախանյանի կողմից 22.06.2012թ-ին հայցադիմումը ընդունվել է վարույթ:

Գտնելով, որ դատավոր Գ. Կարախանյանի նախագահությամբ գործը քննվելու դեպքում կխախտվի հայցվորի կողմից անկողմնակալ և անաչառ դատական քննության իրավունքը, ինքնաբացարկ հայտնելու միջնորդություն է հայտնվել դատավորին՝ նրա անաչառության ու կողմնակալության վերաբերյալ ողջամիտ կասկած հարուցող հանգամանքների առկայության հիմքով: Սակայն դատավոր Գայանե Կարախանյանը, ըստ փաստաբանի, առանց որևէ հիմնավորման մերժել է ինքնաբացարկ հայտնելու միջնորդությունը:

Տ. Հայրապետյանը, որպես դատավորի անաչառության վերաբերյալ ողջամիտ կասկած հարուցող հանգամանք նշում է մասնավորապես այն, որ նույն կողմերի մասնակցությամբ և նույն գույքի` նախկին «Միլանո» խանութի շենքի օտարման հարցերով նույն դատավորը արդեն երկու անգամ գործ էր լսել և երկու անգամն էլ որոշում էր կայացրել ի վնաս գույքի սեփականատիրոջ: Ընդ որում, մեկ անգամ գործը քննվել էր առանց սեփականատիրոջ մասնակցության, ով չէր ստացել դատական ծանուցումը, և գործը ավարտվել էր 15-20 րոպեում, որի ընթացքում հնարավոր չէր անգամ արագ թերթել գործի նյութերը:

«Մյուս գործով դատավոր Կարախանյանը համառորեն չէր ցանկանում նույն գույքի սեփականատիրոջ հայցն ընդունել վարույթ, /հայցադիմումը վերադարձվեց, միայն վերաքննիչի բեկանելուց հետո այն ընդունվեց վարույթ/, և երեք անգամ մերժվեց հայցի ապահովման միջոցներ կիրառելու միջնորդությունը, ինչի արդյունքում քանդվեց այն գույքը, որի նկատմամբ ցանկանում էր սեփականություն ձեռք բերել նախկին սեփականատերը: Այսպիսով գործը դեռևս դատարանում չքննված փաստացի դատական պաշտպանությունը դարձավ անիմաստ»,- նշում է կողմի ներկայացուցիչը:

Ըստ նրա, եթե դատավոր Գ. Կարախանյանը շարունակի նշված գործի քննությունը, ապա կխախտվի նաև Կոնվենցիայի 6/1/ հոդվածով երաշխավորված անձի անկախ և անաչառ դատաքննություն ունենալու իրավունքը: «Եվրոպական դատարանը շատ գործերով նշել է, որ անձի անկախ և անաչառ դատաքննության իրավունքը ենթադրում է, որ ոչ միայն դատաքննությունը պետք է անկախ և անաչառ լինի, այլ այդ անկախությունը և անաչառությունը պետք է տեսանելի լինի /Piersak v Belgium /1982/, Bulur v Austria /1996/»,- նշվում է բողոքում: