Փաստ ինֆո

Ամերիկյան «Մուսուլմանների անմեղությունը» ֆիլմի նկատմամբ դժգոհությունը, որի մասին   իր բացասական վերաբերմունքն էր արտահայտել նաև ԱՄՆ պետքարտուղար Հիլարի Քլինթոնը, ընդարձակում է աշխարհագրությունը: Ասիական մի շարք երկրներից այն անցել է նաև Ավստրալիա մայրցամաք և բողոքի ցույցի հանել հազարավոր մահմեդական ավստրալացիները:

Ինչպես հաղորդում է ԻՏԱՐ-ՏԱՍՍ-ը,  ավստրալիական ամենամեծ քաղաքի ոստիկանությունը ստիպված է եղել օգտագործել արցունքաբեր գազ՝ ցրելու Սիդնեյի փողոցներ դուրս եկած առավել ագրեսիվ ցուցարարներին:

Իրենց դժգոհությունը շուրջ 1000 ծայրահեղ բորբոքված մահմեդական սիդնեյցիներ արտահայտել են  ԱՄՆ գլխավոր հյուպատոսության շենքի մոտ: Նրանք կրել են «Մեր մահացածները դրախտում են, իսկ ձերը` դժոխքում», «Կտրեք արարչին անպատվողների գլուխը» պահանջով պաստառներ: Այստեղ ցուցարարների և ոստիկանության միջև եղել են առանձին ընդհարումներ, կարգի պահապանների ուղղությամբ նետվել են քարեր և շշեր: Նախնական տվյալներով ոստիկանների մեջ կան վիրավորներ:

Դժգոհության այս ալիքը այնուհետև տեղափոխվել է Սիդնեյի Հայդ պարկ, իսկ քաղաքի կենտրոնական հատվածը հսկողության տակ են վերցրել ոստիկանականները:

Հիշեցնենք, որ Մերձավոր և Հարավ –Արևելյան Ասիայի գրեթե բոլոր երկրներն ընդգրկած դժգոհության պատճառը հանդիսացել է սեպտեմբերի 11-ի տարելիցի առթիվ ԱՄՆ-ում նկարահանված «Մուսուլմանների անմեղությունը» ֆիլմը, որտեղ կան Մուհամմեդ արարչի կյանքի վերաբերյալ անբարետես  դրվագներ:

Այդ ֆիլմի ստեղծմանը մասնակցել է ամերիկացի պաստոր Թերրի Ջոնսը: Ֆլորիդացի այս հոգևորականը հայտնի է  Ղուրանը  հանրության աչքի առջև մի քանի անգամ վառելու իր արարքներով:  Այդ ֆիլմի առանձին դրվագներ տեղադրվել են YouTube-ում և առաջ բերել մահմեդական աշխարհի շատ ներկայացուցիչների զայրույթը: