Փաստ ինֆո

Մոսկվայի Նագատինյան դատարանը մայրաքաղաքի մշակութային ժառանգության օբյեկտներ զավթելու փորձի համար, մինչև ս/թ հոկտեմբերի 9-ը ժամկետով, ձերբակալել է «Մոսկովյան կապիտալ» բանկի խորհրդի նախկին նախագահ Վիկտոր Կրեստինին:

Մեղադրյալի փաստաբան Ալեքսեյ Պերշինը միջնորդել է, որպեսզի նրան ազատեն` կապված ՌԴ քրեական օրենսգրքի հոդված 94-ի /Կրեստինը դատական դահլիճ էր ուղեկցվել կալանվելու պահից 48 ժամ հետո/, հաղորդում է «РИА Новости»-ին: Քննիչներն, ընդհակառակը, միջնորդել էին խափանման միջոց ընտրել կալանքը, հիմնավորելով դա այն հանգամանքով, որ Կրեստինը կարող է թաքնվել կամ ճնշում գործադրել վկաների վրա ու փոխել հետաքննության ճիշտ ընթացքը:

«Կոմերսանտ» թերթի տվյալներով, այդ գործի շրջանակներում երեքշաբթի օրը կալանվել են Կրեստինը, «Ավանդների ներդրման ապահովագրության» պետական կորպորացիայի աշխատակից Միխաիլ Բաշմակովը, «Պրոեկտ» ընկերության փոխտնօրեն Օլգա Վոզնյակը և «Գրան» հաստատության նախկին գլխավոր տնօրեն Ալեքսեյ Վոլկովը: Նրանց նկատմամբ հարուցված է քրեական գործ համապատասխան քրեական օրենսգրքի հոդված 159-ի /խարդախություն/:

Նախորդ օրը ՌԴ ՆԳ նախարարության տնտեսական անվտանգության և կոռուպցիայի դեմ պայքարի գլխավոր վարչության մամլո ծառայությունը տեղեկացրել էր, որ կասկածյալների մեջ են նաև Ռուսաստանի պետական գույքի կառավարման Մոսկվայի ստորադաս հաստատության աշխատակիցներ, բանկերի և ընկերությունների ղեկավար կազմի աշխատակիցներ, միջնորդ դատարանի ներկայացուցիչներ:

Քննության տվյալներով օտարման վտանգի առջև էին հայտնվել Ռոգոժևյան յամսկոյ սլոբոդայի 19-րդ դարի համալիրը, 18-րդ դարի կեսերի ճարտարապետական հուշարձան Դոլգոռուկովների տունը, 19-րդ դարի առաջին քառորդին վերագրվող Սնեգիրևի կալվածքն իր օժանդակ կառույցներով և դաշնային նշանակության այլ մշակութային օբյեկտներ: Որոշ աղբյուրների համաձայն նման վտանգի առջև հայտնված են եղել 15, մյուսների ասելով` ավելի քան 100 օբյեկտ: Իսկ ՌԴ ՆԳ-ն հաղորդում է, որ բոլոր այդ մշակութային ժառանգությունների ընդհանուր արժեքը գերազանցում է 10 մլդ ռուբլին:

Խարդախության սխեման նախատեսել է բոլոր օբյեկտների զավթում անօրինական գրավադրմամբ և «Մոսկովյան կապիտալ» բանկի կողմից տրվող ձևական երաշխիքների հիման վրա: