Փաստ ինֆո

Տնտեսական մրցակցության պաշտպանության պետական հանձնաժողովը (ՏՄՊՊՀ) սպառողներին մոլորեցնելու, անբարեխիղճ մրցակցություն վարելու համար պատասխանատվության կենթարկի «Հայ և որդի Մարտիրոսյաններ», «Մանգո» անունով խանութների ցանցին և «Սեմի Ինտերթրեյդ» ընկերությանը:

«Ընկերությունն իրեն հավասար մրցակից չունի ոչ միայն Հայաստանում, այլև ողջ տարածաշրջանում»: Եթեր հեռարձակվող այս գովազդի համար հենց հանձնաժողովը պատասխանատվության ենթարկեց «Հայր և որդի Մարտիրոսյաններ» ընկերությանը:

Սեպտեմբերի 14-ին տեղի ունեցած նիստի ընթացքում ՏՄՊՊՀ նախագահ Ա. Շաբոյանը նշեց, որ տնտեսվարողն իրավասու չէ նշելու, որ իր արտադրանքն օրինակ «եզակի է», «ամենալավն է», «համար առաջինն է»: Ըստ նրա` քարերի ներկրմամբ և իրացմամբ զբաղվող ընկերությունն իր այդ գովազդով դաշտում անհավասար պայմաններ է ստեղծում: Մինչդեռ օրենքն արգելում է այնպիսի գովազդների պատրաստումը, որոնք վերաբերում են այլ տնտեսվարողների դիրքի և նրանց արտադրած ապրանքների համեմատություններին:

Տնտեսական մրցակցության պաշտպանության պետական հանձնաժողովը թեժ գծի (010 54-40-04 ) միջոցով բազմիցս դժգոհություններ է ստացել սպառողներից՝ հագուստի վաճառքով զբաղվող ընկերությունների վարած զեղչային քաղաքականության վերաբերյալ: Քաղաքացիները նշել են, որ հայտարարված զեղչերը ոչ միշտ են համապատասխանում իրականությանը: Երկու ամիս առաջ ՏՄՊՊՀ-ն ուսումնասիրություն է սկսել հագուստի մանրածախ վաճառքով զբաղվող առավել հայտնի ու խոշոր խանութներում:

«Մանգո» հագուստի խանութի ցուցափեղկին նշված է եղել 50 % զեղչ` ամբողջ տեսականու համար, սակայն ստուգման միջոցով պարզվել է, որ «Մանգոն» իր խանութում ունեցել է նոր ապրանքների խմբաքանակ, որոնք բոլորովին էլ զեղչված չեն եղել:

«Նման մեթոդով տնտեսվարողը փորձում է մոլորեցնել սպառողին, իր վարած զեղչային քաղաքականությամբ սպառողներին խանութ հրավիրել»:

ՏՄՊՊՀ նախագահ Արտակ Շաբոյանի խոսքով, սպառողին խանութ հրավիրելու համար նման զեղչային քաղաքականություն բազմաթիվ խանութներ են վարում, ամբողջ տեսականու համար են զեղչեր հայտարարում, բայց գնորդները միայն ապրանքը գնելիս են պարզում, որ դա վերաբերում է միայն մի մասին: Ուստի նա սպառողներին կոչ արեց այդպիսի դեպքերի հանդիպելիս դիմել ՏՄՊՊՀ: Ա. Շաբոյանի խոսքով` հանձնաժողովը պարբերաբար ուսումնասիրություններ է իրականացնելու խախտումները հայտնաբերելու համար:

ՏՄՊՊՀ-ի ուշադրությանը արժանացած «Սեմի Ինտերթրեյդ»- ը չգրանցված ապրանքանիշի վաճառքով խոչընդոտել է այլ ընկերության գործունեությանը: Հանձնաժողով է դիմել մանկական տակդիրների ներկրմամբ զբաղվող «Լիմեթ լիմիթեդ» ընկերությունը` բողոքելով, որ շուկայում հայտնվել են նույն ապրանքային նշաններով և փաթեթավորմամբ մանկական տակդիրներ և թաց անձեռոցիկներ, որոնց փաթեթի վրա նշված է, թե տվյալ ապրանքների պաշտոնական ներկայացուցիչը Հայաստանում հանդիսանում է «Սեմի Ինտերթրեյդ»-ը: Մինչդեռ այդ ապրանքատեսակների բացառիկ պաշտոնական ներկայացուցիչը մեր երկրում` «Լիմեթ լիմիթեդ»-ն է:

ՏՄՊՊՀ-ի որոշմամբ երեք ընկերությունների նկատմամբ կկիրառվի խիստ պատժաչափ, սակայն առայժմ տուգանքի չափը հանձնաժողովը չէր կարող հրապարակել` պատճառաբանելով, որ դիմել են պետական եկամուտների կոմիտեին` այդ տնտեսվարողների տարեկան հասույթը ճշտելու համար և մինչ այժմ պատասխան չեն ստացել:

Ա. Շաբոյանի խոսքով` օրենքի համաձայն անբարեխիղճ մրցակցության դրսևորման դեպքում տուգանքը հաշվարկվում է տնտեսվարողի տարեկան հասույթի 1%-ի չափով: