Փաստ ինֆո

Սեպտեմբերի 12-ին ՀՀ վարչական դատարանում տեղի ունեցավ ՀՀ քաղաքաշինության նախարարության՝ ընդդեմ «Կետրին դիզայն» ՍՊԸ-ի հայցով նախնական դատական նիստը: Քաղաքաշինության նախարարությունը դիմել է վարչական դատարան՝ 18.12.2008թ. տրված թիվ 12672 լիցենզիան դադարեցնելու պահանջով:

Դատական նիստին ներկա էր հայցվորի ներկայացուցիչ Գուրգեն Գոլեցյանը: Թեև պատասխանող կողմը պատշաճ կերպով ծանուցվել էր նիստի մասին, սակայն դատական նիստին չէր ներկայացել:

Նախագահող դատավոր Ռուզաննա Հակոբյանը առաջնորդվեց ՀՀ վարչական դատավարության օրենսգրքի 86-րդ հոդվածի 2-րդ մասով՝ համաձայն որի, նախնական դատական նիստի մասին պատշաճ ծանուցված հայցվորի կամ պատասխանողի, ինչպես նաև դատավարության այլ մասնակիցների չներկայանալու դեպքում նախնական դատական նիստը կարող է անցկացվել նրանց բացակայությամբ։

Հայցվորի ներկայացուցիչ Գուրգեն Գոլեցյանը դատական նիստի ընթացքում ներկայացրեց հայցվորի դիրքորոշումը, այն է՝ 2010 թ. դեկտեմբերի 8-ին ընդունված «Լիցենզավորման մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի 9-րդ հոդվածի 1-ին կետի համաձայն՝ օրենքի ուժի մեջ մտնելուց հետո օրենքով սահմանված լիցենզավորման ենթակա այն գործունեության տեսակները, որոնք օրենքն ուժի մեջ մտնելու պահին գործողության մեջ են գտնվել և օրենքով տվյալ գործունեության տեսակները համախմբվել են մեկ լիցենզավորման ենթակա գործունեության տեսակում, օրենքի ուժի մեջ մտնելուց հետո 6-ամսյա ժամկետում ենթակա են վերաձևակերպման:

Սակայն «Կետրին դիզայն» ՍՊԸ-ի կողմից չէր կատարվել օրենքի պահանջը: Ուստի քաղաքաշինության նախարարությունը պահանջում է դադարեցնել ընկերության լիցենզիայի գործողությունները, որպեսզի ընկերությունն ազատվի տույժ-տուգանքներից:

Հայցվորի ներկայացուցիչ Գուրգեն Գոլեցյանի խոսքով՝ այս պահին ընկերության լիցենզիան կասեցված է, իսկ կասեցված լիցենզիան չի համարվում դադարեցված:
Որպես հայցապահանջը հիմնավորող ապացույց, հայցվորը դատարանին ներկայացրել է

Քաղաքաշինության նախարարի աշխատակազմի ղեկավարի գրությունը, որով ընկերությանը ծանուցել են «Լիցենզավորման մասին» ՀՀ օրենքում փոփոխության մասին: Ներկայացվել է նաև Լիցենզավորման կենտրոն-գործակալության ստացական տեղեկացումը:

Քանի որ դատարանին որպես հայցապահանջը հիմնավորող ապացույց ներկայացված Քաղաքաշինության նախարարի աշխատակազմի ղեկավարի գրությունը հասցեագրված չէր, իսկ ստացական-տեղեկացումն էլ կնքված չէր, ուստի դատավոր Ռուզաննա Հակոբյանը ներկայացվածը որպես ապացույց չընդունեց: Պահանջելով հայցապահանջը հիմնավորող այլ պահանջներ՝ դատավորը գտավ, որ գործը պատրաստ չէ դատաքննության նշանակելու համար։

Հաջորդ նախնական դատական նիստը տեղի կունենա 2012 թ. նոյեմբերի 6-ին ժ. 16:00-ին: