Փաստ ինֆո

Սեպտեմբերի 12-ին Ազգային ժողովը երկրորդ ընթերցմամբ քննարկեց իր կանոնակարգ-օրենքում փոփոխություններ և լրացումներ նախատեսող օրինագիծը: Նպատակը փոքրաթիվ խմբակցություններին ԱԺ բոլոր 12 մշտական հանձնաժողովների աշխատանքներին լիարժեք մասնակցելու հնարավորություն ընձեռնելն է: Նշենք, որ այս գումարման ԱԺ-ում այդպիսիք չորս են. «Հայ ազգային կոնգրես»` 7 պատգամավոր, «Օրինաց երկիր»` 6, «Հայ Յեղափոխական Դաշնակցություն» և «Ժառանգություն»` 5-ական:

ԱԺ գործող կանոնակարգ-օրենքով նախատեսված է, որ, եթե խմբակցության, պատգամավորական խմբի անդամների ընդհանուր թիվը փոքր է մշտական հանձնաժողովների ընդհանուր թվից, ապա խմբակցությունը, պատգամավորական խումբն  իրավունք ունեն իր անդամին ներկայացնելու ոչ ավելի, քան երկու մշտական հանձնաժողովի կազմում ընդգրկվելու համար` յուրաքանչյուր մշտական հանձնաժողովում ունենալով մեկական պատգամավոր:

ԱԺ նախագահ Հովիկ Աբրահամյանի և Պետաիրավական հարցերի մշտական հանձնաժողովի նախագահ Դավիթ Հարությունյանի հեղինակած օրինագծով առաջարկվում է փոքրաթիվ խմբակցության, պատգամավորական խմբի  անդամին տալ ոչ ավելի, քան երեք մշտական հանձնաժողովի կազմում ընդգրկվելու իրավունք:

Հաշվի առնելով ընդդիմության առաջարկները, երկրորդ ընթերցմամբ ներկայացված լրամշակված նախագծում լրացուցիչ մի քանի դրույթներ են նախատեսվում` մեկից ավելի մշտական հանձնաժողովներում ընդգրկված պատգամավորներին բոլոր այդ հանձնաժողովների աշխատանքներին լիարժեք մասնակցության հնարավորություն ընձեռնելու, նաև այդ հանձնաժողովների աշխատանքներից բացակայելու հարցերը կանոնակարգելու նպատակով:

Ներկայումս գործող կանոնակարգի համաձայն, պատգամավորը պարտավոր է  մասնակցել ԱԺ-ի նիստերին, այն հանձնաժողովների, ենթահանձնաժողովների, աշխատանքային խմբերի նիստերին, որոնց կազմում նա ընդգրկված է, ինչպես նաև տվյալ հանձնաժողովների կազմակերպած խորհրդարանական լսումներին: Դրանցից անհարգելի բացակայած օրերի համար պատգամավորին աշխատավարձ չի վճարվում:

Ներկայացված օրինագծով առաջարկվում է կատարել լրացում, ըստ որի մեկից ավելի մշտական հանձնաժողովների կազմում ընդգրկված պատգամավորի բացակայությունը այդ հանձնաժողովներից մեկի նիստից կամ կազմակերպած խորհրդարանական լսումներից չի համարվի անհարգելի, եթե այդ պահին նա մասնակցել է մեկ այլ հանձնաժողովի նիստին կամ լսումներին: Յուրաքանչյուր ամսվա ավարտից հետո` 10-օրյա ժամկետում, հանձնաժողովի նախագահը ԱԺ-ի նախագահին կներկայացնի այդ ամսվա ընթացքում նիստերից և լսումներից հանձնաժողովի անդամների բացակայության մասին տեղեկանք:

Միևնույն ժամանակ լրամշակվել է նաև հանձնաժողովների նիստերի հրավիրման կարգը: Ներկայումս մշտական հանձնաժողովների հերթական նիստերը, որպես կանոն, հրավիրվում են ուրբաթ օրերը՝ ժամը 11-ին: Սա ակնհայտ խոչընդոտ է մի քանի հանձնաժողովներում ընդգրկված պատգամավորի համար: Այդ իսկ պատճառով նախատեսվում է նիստերը հրավիրել տարբեր օրերին` ԱԺ-ի որոշմամբ սահմանված ժամանակացույցին համապատասխան: