Փաստ ինֆո

Բրիտանացի պահպանողական քաղաքական գործիչ Մարկ Պրիտչարդը կանխագուշակել է «ահավոր խորհրդարանական աղմուկ», եթե իրականացվի փոփոխություն էվթանազիան արգելող օրենքում, հաղորդում է BBC news-ը:

Այս արտահայտությունը հնչել է ի պատասխան Մեծ Բրիտանիայի առողջապահության նոր նախարարների Աննա Սուբրիի և Նորման Լեմբի այն ենթադրության, որ եկել է «մահվան իրավունքի» հարցը վերանայելու ժամանակը:

Բրոկստոուի երկրամասից ընտրված պահպանողականների խորհրդարանական Սուբրին «ծիծաղելի և սարսափելի» է անվանել այն, որ բրիտանացիները ստիպված են «իրենց կյանքն ավարտելու համար մեկնել արտասահման»: Անգլիայում և Ուելսում ինքնասպանին օժանդակությունը համարվում է անօրինական գործունեություն և պատժվում է 14 տարվա բանտարկությամբ: Սուբրին հայտարարել է, որ «Բրիտանիան պետք է տա ինքնասպանության իրավունք» այն քաղաքացիներին, ովքեր զգում են դրա կարիքը: «Դուք իրավունք ունեք ինքնասպան լինեու», հաստատել է նա, դրա հետ միաժամանակ ժխտելով էվթանազիան:

Լիբերալ – դեմոկրատ Լեմբը համաձայնել է գործընկերոջ հետ: Նա նույնպես սրբագրումներ կատարելու «լուրջ հիմնավորումներ» է տեսնում:

Այնուամենայնիվ, Պրիտչարդը վստահ է, որ օրենսդրության փոփոխությունը հանդիպելու է խորհրդարանի անդամների ուժեղ դիմադրությանը: «Դա սայթաքուն ճանապարհ է, որն աստիճանաբար և ժամանակի ընթացքում կկրճատի «կյանքի իրավունքը», հայտարարել է նա:

Բրիտանական բժշկական ասոցիացիան նույնպես հանդես է եկել այդ ոլորտում օրենսդրական փոփոխության դեմ: Ասոցիացիայի նախագահ բարոնուհի Հոլինսը քննադատել է այդ թեմայով քննարկումները վերսկսելու փորձերը: «Օրենքի փոփոխությունը կնշանակի կյանքի և մահվան միջև սահմանի ամբողջական փոփոխություն», ասել է նա` ելույթ ունենալով Sky News-ում:

Առողջապահության նախարարությունը Սուբրի արտահայտությունները անվանել է նրա անձնական տեսակետը: Իսկ արդարադատության նախարարությունը հաստատել է, որ կառավարության ծրագրերում օրենքում «մահվան իրավունքի մասին»  փոփոխություններ կատարելու հարց չեն եղել: