Փաստ ինֆո

Ընդամենը 10 օրից մենք տոնելու ենք Հայաստանի Հանրապետության անկախության 21-րդ տարեդարձը, այնինչ` 1985թ.-ին ընդունված և հետագայում բազմիցս փոփոխված Վարչական իրավախախտումների մասին ՀՀ օրենսգիրքը բացարձակապես այլ երկրի մասին է: Այս մասին Ազգային ժողովի սեպտեմբերի 11-ի նիստում հայտարարեց «Ժառանգություն» խմբակցության անդամ, «Ազատ դեմոկրատներ» կուսակցության ներկայացուցիչ, ՀՀ նախկին արտգործնախարար Ալեքսանդր Արզումանյանը:

Որպես իրեն զարմացրած վերոհիշյալ փաստի հիմնավորում, նա մեջբերեց այս օրենսգրքի առաջին գլխի առաջին հոդվածը, որով «մենք այսօր առաջնորդվում ենք».

«Վարչական իրավախախտումների մասին Հայաստանի Հանրապետության օրենսդրության խնդիրն է պահպանել ԽՍՀՄ հասարակարգը, սոցիալիստական սեփականությունը, քաղաքացիների սոցիալ-տնտեսական, քաղաքական և անձնական իրավունքներն ու ազատությունները, ինչպես նաև ձեռնարկությունների, հիմնարկների և կազմակերպությունների իրավունքներն ու օրինական շահերը, կառավարման սահմանված կարգը, պետական և հասարակական կարգը, ամրապնդել սոցիալիստական օրինականությունը, կանխել իրավախախտումները, քաղաքացիներին դաստիարակել ԽՍՀՄ սահմանադրությունը, Հայաստանի Հանրապետության սահմանադրությունը և խորհրդային օրենքները ճշտիվ և անշեղորեն պահպանելու, մյուս քաղաքացիների իրավունքները, պատիվն ու արժանապատվությունը, սոցիալիստական համակեցության կանոնները հարգելու, իրենց պարտականությունները բարեխղճորեն կատարելու ոգով, հասարակության հանդեպ պատասխանատվության ոգով»:

«Սա զավեշտ է, և առաջին գլուխն ամբողջությամբ բաղկացած է նման հոդվածներից` վեց հոդված և մեզանից որևէ մեկի՝ թե՛ կառավարության, թե՛ պատգամավորներիս մտքով չի անցել, որ ամոթ է գոյություն չունեցող երկրի տերմինաբանությամբ օրենք գործածենք: Սա մեր ամոթն է՝ սա Հայաստանի անկախ Հանրապետությունն է»,-հայտարարեց Ա.Արզումանյանը` կոչ անելով «հաջորդ անգամ Վարչական իրավախախտումների մասին ՀՀ օրենսգրքում որևէ փոփոխություն ԱԺ բերելիս այս առաջին գլուխն ամբողջությամբ վերաշարադրել»:

Խնդրի վերաբերյալ «Pastinfo.am»-ի արձագանքը տես այստեղ: