Փաստ ինֆո

Այդ մասին Երևանում գտնվող ԵԱՀԿ-ում հավատարմագրված դեսպանների հետ սեպտեմբերի 7-ի հանդիպմանն ընդգծել է Ազգային ժողովի նախագահ Հովիկ Աբրահամյանը:

«Լեռնային Ղարաբաղի հակամարտության կարգավորման հիմքը` Լեռնային Ղարաբաղի ժողովրդի ինքնորոշման իրավունքի ճանաչումն ու այդ իրավունքի իրականացումն է: Հայաստանը հետամուտ է խնդրի կարգավորմանը միայն խաղաղ ճանապարհով, իսկ ռազմական ճանապարհով հակամարտության կարգավորման ցանկացած փորձ կարող է անկանխատեսելի հետևանքներ ունենալ ոչ միայն հակամարտության կողմերի, այլև ողջ տարածաշրջանի համար»,- նշել է Աժ նախագահը:

Նա համոզմունք է հայտնել, որ Ադրբեջանը կոպտորեն ոտնահարում է միջազգային իրավունքը, միջազգային կոնվենցիաներն ու համաձայնագրերը, միջազգային կազմակերպություններում իր իսկ ստանձնած պարտավորությունները, խոչընդոտում է համանախագահների` Լեռնային Ղարաբաղի հիմնախնդրի խաղաղ կարգավորմանն ուղղված ջանքերը, շարունակաբար մերժում հակամարտության հանգուցալուծմանն ուղղված առաջարկները, ձախողում է փոխվստահության մթնոլորտի ձևավորմանն ուղղված բոլոր նախաձեռնությունները, լրջորեն սպառնում է տարածաշրջանի խաղաղությանն ու անվտանգությանը: 

ԱԺ նախագահը խստորեն դատապարտել է  2004 թ.-ին Բուդապեշտում հայ սպա Գուրգեն Մարգարյանին սպանած և ցմահ ազատազրկման դատապարտված ադրբեջանցի սպա Ռամիլ Սաֆարովին Հունգարիայի Հանրապետության իշխանությունների կողմից Ադրբեջանին փոխանցելու և այնտեղ մարդասպանին ներում շնորհելու փաստը` տեղեկացնելով, որ ՀՀ Ազգային ժողովը այս կապակցությամբ ընդունել է հայտարարություն, որը կուղարկվի միջազգային խորհրդարանական կառույցներին և ազգային խորհրդարաններին: 

Նրա խոսքով` անհրաժեշտ է, որ միջազգային հանրությունը գոնե հիմա կարողանա հասկանալ, որ չի կարելի վստահել Ադրբեջանի իշխանությունների անգամ ամենաբարձր մակարդակով տրված երաշխիքին կամ խոստմանը, հատկապես,  եթե այն վերաբերում է մարդու, առավել ևս հայ մարդու անվտանգությանը և չի կարելի վստահել  մի երկրի, որտեղ խրախուսվում է մարդասպանությունը և հայատյացությունը: Նրա համոզմամբ` Ադրբեջանը երբեք չի կարող հանդիսանալ Արցախի բնակչության  ֆիզիկական անվտանգության երաշխավոր: 

Հ.Աբրահամյանը նշել է նաև, որ Ռամիլ Սաֆարովին ազատ արձակելու հունգարա-ադրբեջանական խայտառակ գործարքը կարող է բացասաբար ազդել ոչ միայն բանակցային ողջ գործընթացի, այլև տարածաշրջանային  խաղաղության և կայունության վրա: 

Ինչպես «Փաստինֆո» գործակալությանը հայտնեցինԱԺ հասարակայնության և տեղեկատվության միջոցների հետ կապերի վարչությունից, դեսպանների պատվիրակության ղեկավար, Իռլանդիայի դեսպան Էոին Օ’Լիրը նշել է, որ իրենց այցի նպատակն է տեղում ծանոթանալու իրավիճակին, կատարված աշխատանքին: Նա շեշտել է, որ ԵԱՀԿ-ն ԼՂ հիմնախնդրի միակ ձևաչափ տեսնում է Մինսկի խումբը և սատարում է համանախագահների ջանքերը` ուղղված հակամարտության խաղաղ բանակցությունների միջոցով կարգավորմանը: Նա նշել է, որ ԵԱՀԿ-ն իր խորին մտահոգությունն է արտահայտել սաֆարովյան դեպքի առնչությամբ:

ԱՄՆ դեսպան Յան Քելլին դատապարտել է հունգարական իշխանությունների կողմից Ռամիլ Սաֆարովին Ադրբեջանին փոխանցելու, ինչպես նաև  ադրբեջանական իշխանությունների կողմից նրան ներում շնորհելու փաստը և նշել, որ իրենք մտահոգված են ցանկացած գործողությամբ, որը կվտանգի ԼՂ հակամարտության խաղաղ կարգավորման գործընթացը, ինչը, նրա համոզմամբ, պետք է լուծվի բացառապես Մինսկի խմբի շրջանակներում:

Նրա հետ համակարծիք էր նաև Ռուսաստանի դեսպան Անդրեյ Կելին, ով շեշտել է, որ վերջին իրադարձությունները միջազգային իրավունքի կոպիտ խախտում են և լրջորեն վնասում են բանակցային գործընթացին:

ԱԺ-ում ներկայացված քաղաքական ուժերի ներկայացուցիչները ևս անդրադառնալով խնդրին, ընդգծել են, որ ԱԺ հայտարարությունը ընդունվել է քաղաքական կոնսենսուսով: Նրանք ևս խստորեն դատապարտել են Սաֆարովին ներում շնորհելու Ալիևի հրամանը, նշելով, որ Ադրբեջանում խրախուսվում է այլատյացությունը, էթնիկ և կրոնական հողի վրա կատարված սպանությունը, իսկ հայատյացությունը այդ երկրում քարոզվում է պետական մակարդակով:

Հանդիպման ավարտին դեսպաններին տրամադրվել է ՀՀ ԱԺ հայտարարության անգլերեն տարբերակը: