Փաստ ինֆո

Միջազգային իրավապաշտպան «Human Rights Watch» կազմակերպությունը մեղադրել է ԱՄՆ իշխանություններին ԿՀՎ-ի բանտերում մարդկանց տանջելու մասշտաբները կոծկելու համար:

Կազմակերպությունում կասկածներ կան, որ  պարբերական կտտանքների են ենթարկվել Մուհամմար Քադդաֆիի լիբիացի ընդդիմադիրները, որոնք, այնուհետև, հանձնվել են բռնապետի իշխանության ներքո գործող անվտանգության ծառայությանը:

«Human Rights Watch»-ում գտնում են որ տանջանքներից տուժած միայն 3 մարդու, այն էլ «Ալ Քաիդա» ահաբեկչական կազմակերպության անդամների, մասին պաշտոնական տեղեկատվությունը «ծայրահեղ կասկածելի» է :  Ինչպես հաղորդում է «The Guardian»-ը, կան ապացույցներ, որ ԿՀՎ-ն պարբերաբար օգտագործել է անօրինական եղանակներ նաև աֆրիկյան և ամերիկյան երկրների քաղաքացիներից տեղեկություններ ստանալու  համար:

«Թշնամիներին Քադաֆիի մոտ հասցնելու» գործողություններում, համաձայն  «Human Rights Watch»-ի զեկուցման, մասնակցել են նաև Մեծ Բրիտանիայի և այլ արևմտյան երկրների հատուկ ծառայությունները: Զեկուցումը հիմնված է այն փաստաթղթերի վրա, որոնք Քադաֆիի ռեժիմի տապալումից հետո հայտնաբերվել են լիբիական հատուկ ծառայությունների շտաբ բնակարանում: Գտնվել են նաև հատուկ ծառայությունների աշխատանքների մեթոդները իրենց վրա զգացած 14 նախկին ձերբակալվածներ, որոնք նույնպես հանդես են եկել իրենց ցուցումներով:

Անցած շաբաթ ԱՄՆ գլխավոր դատախազ Էրիկ Հոլդերը հայտարարել էր, որ ոչ մեկը չի կրի պատասխանատվություն ԿՀՎ-ի կողմից կատարված սխալների պատճառով, որոնք տեղ են գտել ահաբեկչության դեմ պայքարի Ջ. Բուշ կրտսերի նախագահության շրջանում: Բայց և այնպես հատուկ ծառայությունների կողմից իրենց իրավունքները չարաշահելու մասին վերջին ապացույցները թույլ են տալիս ԱՄՆ-ում և Մեծ Բրիտանիայում անկախ հետաքննություններ անցկացնելու համար: