Փաստ ինֆո

Այսպես է վերնագրված Ֆրանսիայում Հայաստանի դեսպան Վիգեն Չիտեչյանի հարցազրույցը ֆրանսիական L’Express պարբերականում:

Ֆրանսիայում Հայաստանի դեսպան Վիգեն Չիտեչյանը ներկայացնում է իր զայրույթը և մտահոգությունը` իրավիճակի զարգացման հանդեպ. «Շատ ուժեղ լարվածություն Հայաստանի և Ադրբեջանի միջև: Հայաստանի և Հունգարիայի միջև դիվանագիտական հարաբերությունների կասեցում: Բաքվի անթաքույց սադրանքը Եվրամիության և միջազգային հանրության հանդեպ: Հիմքում սարսափելի սպանություն է, որը կատարվել է Հունգարիայում ՆԱՏՕ-ի կազմակերպած ուսումնական դասընթացների ժամանակ` ադրբեջանցի զինծառայողը սպանել է երիտասարդ հայ սպայի: Հունգարական արդարադատության կողմից ցմահ բանտարկության դատապարտված մարդասպանին օգոստոսի 31-ին հանձնում են Բաքվին, ուր նա որպես ազգային հերոս է դիմավորվում, այնուհետև Ադրբեջանի նախագահը ներում է շնորհում նրան»:

Լրագրողի խնդրանքով ներկայացնելով սպանության դաժան հանգամանքները` դեսպանը նշել է. «Սառնասրտորեն իրագործված այս բացառիկ դաժանության արարքը ցնցել էր ինչպես հունգարական, այնպես էլ ՆԱՏՕ-ի բազմաթիվ այլ երկրների հասարակություններին: Բոլոր եվրոպական կառույցները մեզ այնուամենայնիվ խորհուրդ տվեցին վստահել արդարադատությանը, հաղթահարել հուզմունքը` ապահովելու մեղադրյալի հանդեպ խիստ պատժի սուվերենությունը: Հայաստանյան իշխանություններին ցանկանում էին համոզել, որ խոսքը խելագարի կողմից իրականացվածի մասին է և դա առանձին վերցված դեպք է: Այսօր, հաշվի առնելով այս գործի առնչությամբ Բաքվի կողմից ձեռնարկված միջոցները, մենք ասում ենք, որ տեղի ունեցածը մասնավոր, առանձին դեպք չէր: Մենք անդադար զգուշացնում էինք մեր գործընկերներին և բոլոր հետաքրքրված կողմերին Սաֆարովին Ադրբեջանին հանձնելու վտանգավոր հետևանքների մասին, իսկ Ադրբեջանի վարքագիծը ցույց տվեց, որ մենք, ցավոք, իրավացի էինք»:

«Մենք ամենաբարձր մակարդակով աշխատել ենք հունգարական իշխանությունների հետ, որոնք պարբերաբար վստահեցնում էին, թե Սաֆարովը էքստրադիցիայի չի ենթարկվի: Միևնույն ժամանակ մենք նրանց խորհուրդ էինք տալիս չհավատալ Բաքվի խոստումներին, թե պատիժը կշարունակվի իրականացվել Ադրբեջանում», - ասել է դեսպանը և, հիշեցնելով, որ Սաֆարովին ոչ միայն ներում են շնորհել, այլև մայորի կոչում, վճարել 8 տարվա աշխատավարձը և բնակարանով ապահովել, հավելել է. «Այս ամենը ակնհայտ է դարձնում, որ սպանությունը կատարվել է եթե ոչ հրահանգի, ապա ադրբեջանական պետության հովանավորչության ներքո»:

Լրագրողի հարցին, թե ինչ միջազգային հետևանքներ կարող են տեղի ունենալ, դեսպան Չիտեչյանը պատասխանել է. «Հունգարական կառավարության որոշումը մեզ համար անընդունելի է: Բուդապեշտը չէր կարող իմանալ Բաքվի իրական մտադրությունների մասին: Իրականում Հունգարիան, Եվրոպական միության, Եվրախորհրդի, ՆԱՏՕ-ի, ԵԱՀԿ-ի անդամը, մասնակից է ադրբեջանական կողմի դավադրությանը` մարդասպանի էքստրադիցիան արդարացնելու նպատակով»:

Վիգեն Չիտեչյանը նաև նշել է, որ Հայաստանը զարմացած չէ Բաքվի վարքագծով, բայց անպատվություն է համարում Հունգարիայի որոշումը:

Ինչ վերաբերում է պատերազմի վերսկսման վտանգին, դեսպանն ընդգծել է, որ Բաքվի նման վարքագծի պայմաններում, երբեք չի կարել անվտանգ զգալ:

«Մենք ատում ենք պատերազմը, բայց այն մեզ չի սարսափեցնում: Բայց տվյալ դեպքում մենք ականատես ենք Ադրբեջանի կողմից ամբողջ միջազգային հանրությանն ուղղված մարտահրավերին: Հարցը շատ պարզ է. արդյո՞ք նավթային փողերն ավելին արժեն, քան մարդկային բարոյականությունը և Եվրոպայի հիմնարար արժեքները»,- ասել է դեսպանը և վերջում նշել, որ մենք պարզ պատասխան ենք ակնկալում մեր գործընկերներից և միջազգային հանրությունից:

Հարցազրույցն ամբողջությամբ կարող եք կարդալ այստեղ` http://www.lexpress.fr/actualite/monde/europe/meurtre-d-un-armenien-l-assassinat-a-ete-commis-sous-le-patronage-de-l-etat-azeri_1156531.html