Փաստ ինֆո

«Բժշկական սխալ չի արձանագրվել, բայց եղել է կալանավորում» վերտառությամբ  հրապարակման մեջ «Pastinfo.am»-ն առողջապահության  նախարարությունից փորձել էր պարզել, թե արդյոք եղել է բժշկական սխալ, որը մայրական մահվան պատճառ է դարձել:

ԱՆ տվյալների համաձայն՝ վերջին տարիների մայրական մահվան դեպքերի մասնագիտական վերլուծությունների արդյունքում չեն արձանագրվել ախտորոշման և բուժման այնպիսի սխալներ, որոնք պատճառահետևանքային կապ ունեն մահվան պատճառի հետ։ Սակայն հայտնաբերվել են կազմակերպչական, գործելակերպային, դեոնտոլոգիական որոշ սխալներ և բացթողումներ, որոնց կապակցությամբ դեպքին առնչվող բուժաշխատողները ենթարկվել են պատասխանատվության: Այդ բուժաշխատողների թվում է եղել նաև Աբովյանի ծննդատան անեսթեզիոլոգը, ով մայրական մահվան հետ կապված 2012թ. հունիս ամսին կալանավորվել է։

Սակայն «Pastinfo.am»-ի հավաստի աղբյուրների համաձայն՝ Աբովյանի ծննդատան անեսթեզիոլոգի կալանավորման պատճառը եղել է հենց բժշկական սխալը:  

Ըստ նախաքննական վարկածի՝ «Աբովյանի ծննդատուն» ՊՓԲԸ-ում որպես բժիշկ ռեանիմատոլոգ աշխատող Վլադիմիր Մյագկովը հղի Ֆլորա Աբգարյանին «կեսարյան» վիրահատության նախապատրաստման ընթացքում ցուցաբերած բուժօգնության ժամանակ սխալ է գնահատել դժվար ինտուբացիայի պոտենցիալ հնարավորությունը, որն Աբգարյանի մոտ ըստ «Մալոպատիի» համապատասխանել է ոչ թե 2 բալի, այլ գերազանցել է նրան: Վերոգրյալը բերել է իր դժբախտ հետևանքների, շնչափողի ինտուբացիայի չհաջողված երեքանգամյա փորձերը բերել են ծանրագույն հիպօքսիկ բարդությունների և սուր պրոգրեսիվ սիրտ-անոթային ու շնչական անբավարարության զարգացմանը: Այնուհետև թույլ տալով դժվար ինտուբացիայի արձանագրության խախտում, համաձայն որի՝ նա պետք է ինտուբացիայի երկրորդ չհաջողված փորձից հետո դադարեցներ հետագա փորձերը, դիմային կամ լարինգեալ ոչ ինվանզիվ օդափոխությամբ շնչառություն տար հիվանդին մինչև ինքնուրույն շնչառության վերականգնումը և սպասեր այլ մասնագետի օգնությանը:

Դրանից հետո միայն քննարկեր հիվանդի այլընտրանքային վարումը անհետաձգելի ցուցումներով: Ինչպես նաև ինտուբացիոն փորձերի հետևանքով Ֆ. Աբգարյանին պատճառված լեզվարմատի և վերին շնչական ուղիների տրավմատիկ վնասվածքները, ինչպես նաև արյան առկայությունը վերին շնչուղիներում և թոքերում իրենց հերթին գործոններ են հանդիսացել , որոնք խորացրել են արդեն զարգացած շնչական և սիրտ-անոթային խանգարումները, սուր շնչական անբավարարությունը, հղիի մոտ վերջնական առումով առաջացնելով մեխանիկական շնչահեղձություն, պատճառ է հանդիսացել հղիի և պտղի մահվան:

Այսպիսով, ըստ նախաքննության, Վլ. Մյագկովն իր մասնագիտական պարտականությունները կատարել է ոչ պատշաճ կարգով, որն անզգուշությամբ առաջացրել է բուժվող հիվանդի մահ: Մյագկովը կատարել է արարք, որը նախատեսված է ՀՀ քրեական օրենսգրքի 130-րդ հոդվածի 2-րդ մասով: Ելնելով վերոգրյալից, ղեկավարվելով ՀՀ քրեական դատավարության օրենսգրքի 202, 203 հոդվածների պահանջներով, որոշվել է Վլ. Մյագկովին ներգրավել որպես մեղադրյալ, նրան մեղադրանք առաջադրել ՀՀ քրեական օրենսգրքի 130 հոդվածի 2-րդ մասով:
 
Հիշեցնենք, որ վերջերս  դատաբժշկական փորձաքննություն է նշանակվել  Սպիտակի Ջրաշեն գյուղի բնակչուհի, 20 շաբաթական հղի 43-ամյա Հրածին Մալխասյանի մահվան փաստով:
ՀՀ ոստիկանությունից տեղեկացնում են, որ Էրեբունու քննչական բաժնում այս գործով նախաքննությունը շարունակվում է:

Ի գիտություն

Հանցագործության համար կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ օրենքով սահմանված կարգով` դատարանի օրինական ուժի մեջ մտած դատավճռով: