Փաստ ինֆո

ՀՀ կենտրոնական ընտրական հանձնաժողովը սեպտեմբերի 2-ի արտահերթ նիստում էլեկտրոնային վիճակահանությամբ իրականացրել է Բամբակաշատ, Հուշակերտ, Լանջիկ համայնքներում սեպտեմբերի 23-ին կայանալիք տեղական ինքնակառավարման մարմինների արտահերթ ընտրություններին տեղամասային ընտրական հանձնաժողովների նախագահների և քարտուղարների պաշտոնների բաշխումը` Ազգային ժողովում խմբակցություն ունեցող կուսակցությունների և կուսակցությունների դաշինքի միջև:

Ինչպես «Փաստինֆո» գործակալությանը հայտնեցին ԿԸՀ մամուլի ծառայությունից, տեղամասային ընտրական հանձնաժողովների նախագահների և քարտուղարների պաշտոնները բաշխվել են հետևյալ համամասնությամբ`

Հայաստանի Հանրապետական կուսակցություն (ՀՀԿ)` 2-ական,
«Բարգավաճ Հայաստան» կուսակցություն (ԲՀԿ)` 2-ական,
Հայ ազգային կոնգրես կուսակցությունների դաշինք (ՀԱԿ)` 1-ական:

Նիստում քննարկվել է Լոռու մարզի Վանաձոր համայնքի ղեկավարի թեկնածու Տարոն Ապրեսյանի դիմումը` ՀՀ կենտրոնական ընտրական հանձնաժողովի 2011թ. օգոստոսի 15-ի թիվ 64-Ա որոշումը վերանայելու վերաբերյալ: Դիմումատուն նշել էր, որ ԿԸՀ-ի որոշմամբ թիվ 30 ԸԸՀ-ի անդամ է նշանակվել, իսկ այնուհետև ԸԸՀ-ի նախագահ ընտրվել Տիգրան Արբակի Պապանյանը, ով հանդիսանում է Վանաձորի քաղաքապետարանի ճարտարապետության և քաղաքաշինության բաժնի պետ:

Ըստ դիմումատուի, Տ.Պապանյանը Վանաձորի քաղաքապետ, համայնքի ղեկավարի թեկնածու Սամվել Դարբինյանի հետ գտնվում է բարեկամական կապի մեջ` քրոջ ամուսինն է: Մատնանշելով այս փաստը և ղեկավարվելով ՀՀ Ընտրական օրենսգրքի 37-րդ հոդվածի 1-ին մասով և 46-րդ հոդվածի 1-ին մասի 1)-ին կետով՝ Տ.Ապրեսյանն եզրակացրել էր, որ Պապանյանի նախընտրական գործունեությունը, որպես ԸԸՀ-ի նախագահ, կարող է ազդել ընտրությունների անկողմնակալ և անաչառ ընթացքի վրա՝ կասկածի տակ դնելով ընտրությունների արդյունքները:

ԿԸՀ-ն քննարկման արդյունքում մերժել է Տ. Ապրեսյանի դիմումը` փաստելով, որ «Ընտրատարածքային ընտրական հանձնաժողովների անդամներ և ընտրատարածքային ընտրական հանձնաժողովների առաջին նիստեր նշանակելու մասին» 2011թ• օգոստոսի 15-ի իր որոշման ընդունումից հետո մինչ օրս առկա չեն այնպիսի հանգամանքներ, որոնք սահմանափակում կամ արգելում են Տիգրան Պապանյանին հանդիսանալու հանձնաժողովի անդամ: Ըստ հանձնաժողովի, ներկայացված դիմումում անգամ չի նշվում որևէ հիմք, փաստարկ, հանգամանք, որն օրենքին համապատասխան կարող է հիմք հանդիսանալ Պապանյանի լիազորությունները դադարեցնելու համար: Դիմումատուն ընդամենը վկայակոչում է ապագայում հնարավոր խախտումների վերաբերյալ իր կասկածները կամ դատողությունները, ինչը, Ընտրական օրենսգրքի պահանջներին համապատասխան, չի կարող դիմումը բավարարելու հիմք հանդիսանալ:

Արտահերթ նիստում ՀՀ կենտրոնական ընտրական հանձնաժողովի վերահսկիչ-վերստուգիչ ծառայության ղեկավար Սևակ Հովհաննիսյանը հանձնաժողովի քննարկմանն է ներկայացրել 2012թ. սեպտեմբերի 9-ի ՏԻՄ ընտրություններում 10 հազար և ավելի ընտրող ունեցող համայնքի ղեկավարի թեկնածուների նախընտրական հիմնադրամներ կատարված մուծումների և դրանց օգտագործման վերաբերյալ առաջին հայտարարագրերի ստուգման արդյունքում կազմված տեղեկանքը` 18.08.2012թ.-31.08.2012թ. ժամանակահատվածի համար: