Փաստ ինֆո

2013 թ.-ի հունվարի 1-ից ուժի մեջ կմտնի «Եկամտային հարկի մասին» Ազգային ժողովի կողմից 2010թ.-ի դեկտեմբերի 22-ին ընդունված օրենքը: Ըստ այդմ, ուժը կորցրած կճանաչվեն «Եկամտահարկի մասին» 1997 թ.-ի դեկտեմբերի 27-ի և «Պարտադիր սոցիալական ապահովության վճարների մասին» 1997 թ.-ի դեկտեմբերի 26-ի օրենքները:

Ինչպես ՀՀ կառավարության մամուլի կենտրոնում օգոստոսի 28-ին կայացած ասուլիսում պարզաբանեցին ՀՀ աշխատանքի և սոցիալական հարցերի նախարար Արտեմ Ասատրյանն ու ֆինանսների նախարար Վաչե Գաբրիելյանը, կենսաթոշակային բարեփոխումների շրջանակներում ընդունված «Եկամտային հարկի մասին» օրենքով նախատեսվում է մեկ հարկատեսակում` եկամտային հարկում, միավորել ներկայումս գործող եկամտահարկը, պարտադիր սոցիալական ապահովության և անհատական սոցիալական ապահովության վճարները:

Օրենքով սահմանվում է, որ այն ուժի մեջ մտնելու պահից գործատուն իր միջոցների հաշվին կրելու է լրացուցիչ պարտավորություն` վարձու աշխատողներին յուրաքանչյուր ամսվա համար հաշվարկված աշխատավարձից պահված և վճարված եկամտային հարկի ամբողջ գումարի չափով, եթե օրենքն ուժի մեջ մտնելուց հետո վարձու աշխատողից եկամտային հարկի պահումը հանգեցրել է մինչև օրենքն ուժի մեջ մտնելը հարկումից հետո նրան վճարման ենթակա աշխատավարձի նվազման: «Օրենքն այնպես է մշակվել, որպեսզի աշխատակիցների փաստացի իրական եկամուտները չպակասեն. 2013 թ.-ի հունվարին յուրաքանչյուր աշխատող չպետք է պակաս գումար ստանա, քան ստանում էր 2012 թ.-ի դեկտեմբերին»,-վստահեցրեց ՀՀ ֆինանսների նախարարը` հավելելով. «Եթե տեղի կունենա այդպիսի բան, ապա հարկային մարմինը կիրականացնի վերահսկողություն»:

Եկամտային հարկը պետական բյուջե է վճարվելու ֆիզիկական անձանց եկամուտների հաշվարկման ամսվան հաջորդող ամսվա 20-ից ոչ ուշ: Նոր օրենքով եկամտային հարկը հաշվարկվելու է հետևյալ դրույքաչափերով. մինչև 120 հազար դրամ չափով ամսական հարկվող եկամտի 24.4 տոկոսը, 120 հազար դրամից ավելի եկամուտը` 29 հազար 280 դրամին գումարած 120 հազար դրամը գերազանցող գումարի 26 տոկոսը:

Հարկային գործակալի միջոցով չհարկված եկամուտներից եկամտային հարկը հաշվարկվելու է հետևյալ դրույքաչափերով. Մինչև 1 մլն 440 հազար դրամ տարեկան հարկվող եկամտի 24.4 տոկոսը, 1 մլն 440 հազար դրամից ավելի եկամուտը` 351 հազար 360 դրամին գումարած 1 մլն 440 հազար դրամը գերազանցող գումարի 26 տոկոսը:

Օրենքն ամրագրում է նաև, որ տարվա ընթացքում ձեռնարկատիրական գործունեությունից, բացառությամբ հաստատագրված վճարներով հարկվող գործունեության, եկամուտներ ստացող հարկ վճարողը պարտավոր է կատարել եկամտային հարկի կանխավճարներ` այս օրենքով սահմանված կարգով և ժամկետներում: Հարկ վճարողը հաշվետու տարվա ավարտից հետո հաշվարկում է եկամտային հարկի գումարը` դրանից հաշվանցելով տվյալ տարվա համար վճարված կանխավճարների գումարները:

Ձեռնարկատիրական գործունեությունը նոր սկսող հարկատուն կարող է եկամտային հարկի կանխավճարներ չկատարել մինչև հաջորդ տարվա հունիսի 15-ը` այդ մասին նախօրոք հայտնելով հարկային մարմիններին: