Փաստ ինֆո

Մարդու իրավունքների պաշտպան Կարեն Անդրեասյանը ՀՀ վարչապետ Տիգրան Սարգսյանին առաջարկել է լրացումներ կատարել կառավարության համապատասխան որոշման մեջ և արտոնություններ նախատեսել նաև հաշմանդամի կարգավիճակ ունեցող երեխաների ծնողների կամ խնամակալների  համար:

Ինչպես «Փաստինֆո» գործակալությանը հայտնեցին Պաշտպանի աշխատակազմից, վարչապետն ընդունել էր Պաշտպանի առաջարկը և համապատասխան հանձնարարական տվել։

Հանձնարարականին համապատասխան՝ օրեր առաջ ՀՀ տրանսպորտի և կապի նախարար Գագիկ Բեգլարյանը առաջարկ է ներկայացրել կառավարության որոշմամբ հաստատված  1-ին և 2-րդ խմբերի հաշմանդամների համար սահմանված արտոնությունները տարածել նաև հաշմանդամի կարգավիճակ ունեցող երեխաների ծնողների կամ խնամակալների վրա։

Պաշտպանի աշխատակազմի պարզաբանմամբ, այսօր Հայաստանում հաշմանդամ երեխային տեղափոխելիս մեքենան անհամապատասխան վայրում կանգնեցնելու համար ոստիկանը տուգանում է հաշմանդամ երեխայի ծնողին։ Այս խնդրի վերաբերյալ Պաշտպանի մոտ անհատական ընդունելության ժամանակ իր մտահոգությունն էր հայտնել նաև մանկական պարալիչով տառապող 11-ամյա Անիի մայրը։ Ըստ նրա, երեխային մեքենայից իջեցնելու համար նույնիսկ կարճաժամկետ կայանելու դեպքում նա մի քանի անգամ տուգանվել է ոստիկանության կողմից։

Խնդիրն ուսումնասիրելիս պարզ էր դարձել, որ պատճառը հաշմանդամություն ունեցող անձանց տեղափոխողներին վերաբերող կառավարության համապատասխան որոշումն է, որով սահմանված է, որ տրանսպորտային միջոցների օգտագործման արտոնություններ նախատեսող նշանների ազդեցությունը տարածվում է միայն այն տրանսպորտային միջոցների վրա, որոնք վարում են 1-ին և 2-րդ խմբի հաշմանդամները կամ փոխադրում են նման հաշմանդամների: Այսինքն, կառավարության որոշմամբ սահմանված դրույթով վերոնշյալ արտոնությունները չեն տրամադրվում հաշմանդամի կարգավիճակ ունեցող երեխաների ծնողներին կամ խնամակալներին։

Լուսանկարը՝ ombuds.am-ից