Փաստ ինֆո

ՀՀ  ԶՈւ պատրաստության գլխավոր ջանքերը կենտրոնացված են անձնակազմի վարժվածության մակարդակի պահպանմանը և  զարգացմանը, զորքերի ու դրանց կառավարման մարմինների ներդաշնակմանը և իրենց առջև դրված խնդիրների երաշխավորված կատարմանը:

«2012թ. ուսումնական տարին հայտարարված է  մարտական խնդիրների կատարման  արդյունավետության և մարտական վարպետության ամրապնդման տարի»,- այսօր լրագրողների հետ հանդիպման ժամանակ  նշեց գնդապետ Արմենակ Վարդանյանը:  

Գնդապետի խոսքով՝ տարեցտարի ավելի մեծ ուշադրություն է դարձվում զորամասերի և ստորաբաժանումների մարտական կիրառման շրջաններում՝ մարտավարական զորավարժությունների անցկացմանը:

Իսկ թե այսօր որքանո՞վ է մարտունակ  հայկական բանակը՝ գնդապետ Արմենակ Վարդանյանը պատասխանեց. «Ամենայն պատասխանատվությամբ կարող եմ հայտարարել, որ բանակը ունակ է կատարելու իր առջև դրված  խնդիրները»:

ՀՀ ՊՆ մամուլի քարտուղար Արծրուն Հովհաննիսյանն  էլ  իր հերթին հավելեց, որ  «Հայաստանի ԶՈւ-ի  մարտունակության աստիճանի լավագույն ցուցանիշը՝  հակառակորդի զսպվածության ցուցանիշն է» :
«Զինվորի մարտունակությունը   բարձրացնելու  համար,   կատարելագործվում են մարտական ծրագրերը,  ըստ որի ուսուցանվում է 21-րդ դարի զինվորը»,- նշեց  Արմենակ Վարդանյանը հավելելով, որ  կատարելագործվում  է նաև   ուսումնանյութական բազան,  ՊՆ ձեռք է բերել էլեկտրոնային վարժասարքեր, որոնց  դերը կայանում է նրանում,  որ փոքր ֆինանսական ծախսերով կարելի է ստանալ նույն  արդյունքը,  ինչ զինվորը ստանում էր մարտի դաշտում՝  այսինքն՝ դա նպաստում է  ինչպես մարտական,  այնպես էլ ֆիզիկական պատրաստության պրոցեսը ավելի արդյունավետ դարձնելուն:
ՊՆ-ն  էլեկտրոնային վարժասարքերը տրամադրել  է նաև դպրոցներին»:

«Մարտական պատրաստության ընդհանուր պրոցեսը ներառում է բարոյահոգեբանական դաստիարակության հստակ տարրեր: Արծրուն Հովհաննիսյանը նշեց, որ բանակում ինքնասպանության, օրինախախտումների և այլ բնույթի որոշակի դեպքեր լինում են, սակայն նման դեպքերի կանխարգելման ուղղությամբ իրականացվող  աշխատանքը երևում է ցուցանիշներով. նկատվում  է դեպքերի նվազում,  ինչը հետևողական և դժվարին աշխատանքի արդյունք է:  

«Զինվորների հետ կատարվում է հետևողական և նպատակասլաց  աշխատանք,  այլապես ինքնասպանությունները և սպանությունները ավելի շատ կլինեին»,- նշեց  ՀՀ ՊՆ մամուլի քարտուղարը:

Արծրուն Հովհաննիսյանը հորդորեց  տարբեր  էլեկտրոնային կայքերի  միջոցով հետևել,  թե  հանրապետությունում ինչքան սպանություններ, ինքնասպանություններ ու հանցագործություններ են գրանցվել  և  հավելեց,  որ  ագրեսիվ  մթնոլորտից  բանակ գնալու ընթացքում,   եթե չկիրառվի զսպողական մեխանիզմ, ուղղակի անհնար կլինի  պատկերացնել, բանակում նմանատիպ դեպքերի  քանակը:

Ինչ վերաբերվում է առողջական սահմանափակումներ ունեցող զինծառայողների  ֆիզիկական պատրաստվածության  պարապմունքները  ճիշտ կազմակերպելուն, ապա  այդ  նպատակով ԶՈՒ գլխավոր շտաբի պետի համապատասխան կարգադրության համաձայն՝ յուրաքանչյուր  զինվորի  համար  թույլատրելի վարժությունները  կլինեն  տարբերակված:

Բանակաշինության  գործում  մեծ դեր ունի նաև սպորտը,  արձանագրեց գնդապետը և փաստեց, որ   գրանցվել են լուրջ հաջողություններ,  մեր մարզիկները, մասնակցելով աշխարհի,  Եվրոպայի մի շարք մրցաշարերի,  նվաճել են  6  ոսկե, 4 արծաթե  և 15 բրոնզե մեդալներ, իսկ  ՀՀ առաջնությունում՝ 16 ոսկե, 12 արծաթե  և 14  բրոնզե մեդալներ: