Փաստ ինֆո

Մոսքաղդատարանի վճռով հայ քննիչը միջին աշխատավարձի չափով կաշառք վերցնելու դիմաց կտուգանվի 4 մլն ռուբլով: Ընդ որում՝ քննիչն  առաջին իսկ հարցաքննության ժամանակ կասկածյալին չկալանավորելու համար կաշառք է պահանջել, հաղորդում է Մոսկվայի դատախազության մամլո ծառայությունը:

Մոսկվայի Օչակովո-Մատվեևյան շրջանի ՆԳ քննչական բաժնի ավագ քննիչ, արդարադատության կապիտան, 37-ամյա Երվանդ Օհանյանը ճանաչվել է մեղավոր կաշառք պահանջելու հատկանիշները բնութագրող ՌԴ քրեական օրենսգրքի համապատասխան  հոդվածներով:

Հաստատվել է, որ 2011թ. օգոստոսի 15-ին Օհանյանը, ստանալով հաղորդագրություն հանցագործության վերաբերյալ, սկսել է ստուգումներ անցկացնել մի քաղաքացու կողմից անօրինական հոգեմետ դեղեր պահելու փաստով: Քաղաքացու հետ հանդիպելու ընթացքում քննիչը պահանջել է 200 հազար դրամ` նրան կալանքի չվերցնելու դիմաց:

Ստանալով համաձայնություն, ոստիկանության աշխատակիցը հաջորդ օրը հարուցել է քրեական գործ և սկսել է անցկացնել համապատասխան քննչական գործողություններ:

-Հարցաքննության ընթացքում նա շարունակել է մեղադրյալից կաշառք պահանջել,-նշում է դատախազությունը: - Ընդ որում, Օհանյանը կատարել է իր խոստումը և որոշում է կայացրել քաղաքացու տեղաշարժի հնարավորությունները սահմանափակել`  նրանից  չբացակայելու և համապատասխան վարքագիծ դրսևորելու մասին ստորագրություն վերցնելով:

2011թ. օգոստոսի 17-ին իր առանձնասենյակում քննիչը ստացել է փողերի մի մասը` 50 հազար ռուբլի, որից հետո ձերբակալվել է Մոսկվայի Արևմտյան շրջանի ՆԳ վարչության ներքին անվտանգության աշխատակիցների կողմից:

Դատարանը Օհանյանին դատապարտել է կաշառքի չափը 80 անգամ գերազնցող տուգանքով: Նա զրկվել է  արդարադատության կապիտանի կոչումից և 3 տարվա ընթացքում պետական կամ մունիցիպալ աշխատանքներում պաշտոն զբաղեցնելու իրավունքից: