Փաստ ինֆո

Սանկտ-Պետերբուրգի Քննչական կոմիտեի աշխատակիցներն ավարտել և դատախազություն են ուղարկել ահաբեկչության նախապատրաստման և 10 սպանությունների մեջ մեղադրվող ազգայնական խմբավորման 9 անդամների նկատմամբ գործը: Այդ մասին տեղեկացնում է ռուսական «Վզգլյադ» («Հայացք») թերթը:

Ըստ Քննչական կոմիտեի կայքէջի՝ հանցավոր խմբի պարագլուխը` Գեորգի Տիմոֆեևը, Սանկտ-Պետերբուրգի քաղաքային դատարանի կողմից դատապարտվել է ընթացիկ տարվա հունիսին: Խմբավորման 9 անդամները մեղադրվում են  ՌԴ Քրեական օրենսգրքի մի քանի հոդվածների` սպանություն, սպանության փորձ, ատելության կամ թշնամանքի հրահրում, զենքի, ռազմամթերքի, պայթուցիկ նյութերի և սարքերի անօրինական շրջանառություն, ահաբեկչական գործողություն, հատկանիշներով:

Քննության տվյալների համաձայն, Սանկտ-Պետերբուրգի բնակիչ Գ. Տիմոֆեևը 17-23 տարեկան երիտասարդներից 2009թ.-ին ստեղծել է կազմակերպված խումբ` ծայրահեղական բնույթի հանցագործություններ նախապատրաստելու և իրականացնելու նպատակով: Խմբի անդամների գործունեությունը նպատակաուղղված է եղել կովկասցիների, ասիացիների, աֆրիկացիների նկատմամբ ռասայական և ազգային ատելություն ու թշնամանք հարուցելուն: Խումբը 2009-2010թ.թ.-ին կատարել է տասնյակ ծանր և առանձնապես ծանր հանցագործություններ, այդ թվում` 10 սպանություն, սպանության 5 փորձ:

Խմբի պարագլխի հրահանգով կատարված բոլոր հանցագործությունները տեսանկարահանվում էին` հանրության շրջանում տարածելու նպատակով: Համացանցում նման մի տեսանյութի տեղադրման շնորհիվ` Գանայի քաղաքացի, 25-ամյա Գվաջո Ավենգի 2009թ.-ին կատարված սպանության փաստով, քննիչներին հաջողվեց  «տաք հետքերով» ձերբակալել խմբի երկու, իսկ այնուհետև` մյուս բոլոր անդամներին: