Փաստ ինֆո

2012-2016թթ. դատաիրավական բարեփոխումների ռազմավարական ծրագրի կարևոր նպատակներից մեկը դատական իշխանության համակարգի բոլոր բաղադրիչների գործունեությունը հանրության համար հնարավորինս կանխատեսելի դարձնելն է:

Այդ մասին «Փաստինֆո» գործակալության թղթակցի հետ հարցազրույցում նշեց ՀՀ արդարադատության նախարարի առաջին տեղակալ Գրիգոր Մուրադյանը, նկատելով, որ կանխատեսելիությունն ինքնին էականորեն նվազեցնում է կոռուպցիոն ռիսկերը: Նախատեսվում են կոնկրետ, գործնական քայլեր կոռուպցիոն ռիսկերը նվազեցնելու ուղղությամբ այն դեպքերում, երբ անմիջական շփումներ կան քաղաքացիների ու համապատասխան պետական մարմինների միջև: Մասնավորապես, ռազմավարական ծրագրով նախատեսվում է Նոտարիատում ներդնել էլեկտրոնային նոտարի համակարգը և մեկ պատուհանի սկզբունքը, ինչպես նաև զարգացնել Քաղաքացիական կացության ակտերի գրանցման էլեկտրոնային համակարգը: «Պետք է բացառել հնարավորությունը, որպեսզի այստեղ քաղաքացուց կորզվեն, մեղմ արտահայտված՝ ինչ-ինչ հավելյալ վճարներ, սա շատ հեռանկարային խնդիր է, և ես հեռու եմ այն մտքից, որ մի քանի ամսում կլուծվի. անհրաժեշտ է ապահովել էլեկտրոնային կառավարման համակարգեր բոլոր այս բնագավառներում: Հեռանկարն այն է, որ էլեկտրոնային կառավարումը դառնա միասնական մեկ համակարգ՝ ենթահամակարգերով»,- ասաց Գրիգոր Մուրադյանը:

Ըստ մեկ պատուհանի ծառայություններ մատուցելու համակարգի՝ քաղաքացին դիմում է այն մարմնին, որը վերջնական որոշումն է կայացնում, իսկ միջանկյալ որոշումները հայցում և ստանում է վերջնական որոշումներ կայացնող մարմինը: «Համակարգի ներդրմամբ էապես կբարելավվի քաղաքացուն մատուցվող ծառայությունների, ինչպես նաև բուն վարչարարության որակը: Նախատեսված է, որ հանրային ռեգիստրներ վարող բոլոր այդպիսի կառույցները պետք է ունենան էլեկտրոնային կառավարման նման համակարգ»,- ընդգծեց ՀՀ արդարադատության առաջին փոխնախարարը:

Վարչական դատարանների ծանրաբեռնվածությունը կնվազեցվի

2012-16թթ. դատաիրավական բարեփոխումների ռազմավարական ծրագրով որոշ չափով վերանայվելու է վարչական վարույթի շրջանակներում «վարչական մարմին» հասկացությունը: «Փաստինֆո» գործակալության թղթակցի հետ զրույցում ՀՀ արդարադատության նախարարի առաջին տեղակալ Գրիգոր Մուրադյանը պարզաբանեց, որ մասնավորապես, նախատեսվում է այդ հասկացության մեջ ներառել այն մասնավոր սուբյեկտները, որոնց պետությունը վերապահել է հանրային գործառույթներ:

Դրանով կապահովվի այդ սուբյեկտների որոշումներից, գործողություններից և անգործությունից մասնավոր անձանց դատական պաշտպանությունը: Ըստ ՀՀ արդարադատության առաջին փոխնախարարի, այդ սուբյեկտներն ըստ էության դուրս են մնացել Վարչարարության հիմունքների և վարչական վարույթի մասին օրենքի ներգործության շրջանանակներից:

Ռազմավարական ծրագիրը նախատեսում է նաև նվազեցնել վարչական դատարանների ծանրաբեռնվածությունը: «Այսօր վարչական դատարանները գերծանրաբեռնված են, այդ նպատակով մասնավորապես, անհրաժեշտ է վճարման կարգադրություններ արձակելու ներկայիս վարույթը հանել Վարչական դատավարության օրենսգրքից: Ըստ էության, վճարման կարգադրություններն այնպիսի վարչական ակտեր են, որ անբողոքարկելի են, իսկ դրանց վերաբերյալ դատական քննությունը ենթադրում է ուղղակի միջամտություն գործադիր իշխանության բնագավառ: Սա իշխանությունների տարանջատման սահմանադրական սկզբունքի տեսանկյունից վիճելի է»,- ասաց Գրիգոր Մուրադյանը: Նա հավելեց, որ այս հարցը պետք է լուրջ ուսումնասիրել և ձերբազատվել նման հայեցակարգային լուծումներից, որոնք ժամանակին եղել են գուցե իրավիճակային լուծումներ, սակայն այսօր անհրաժեշտ է օրենսդրության բարեփոխումը դնել ռազմավարական հենքի վրա՝ հստակ կանխորոշելով նպատակները:

Սոնա Մաշուրյան