Փաստ ինֆո

Հայաստանի Հանրապետության կառավարության հուլիսի 26-ի նիստի օրակարգային հարցերի թվում է կառավարության 2009 թ.-ի ապրիլի 2-ի «Հայկական կոնյակի, բրենդիի և խաղողի օղիների գինենյութերի արտադրության համար նախատեսված խաղողի սորտերը և գինենյութերում բնական սպիրտի փաստացի նվազագույն քանակությունները սահմանելու մասին» որոշման մեջ լրացումներ կատարելու մասին նախագիծը:

Ըստ այդմ, առաջարկվում է հիշյալ որոշման հավելվածում բրեդիի գինենյութերի արտադրության համար թույլատրելի խաղողի սորտերի սահմանված ցանկում ներառել նաև Ալիգոտե, Շենին, Կոլոմբարդ-Բ, Ֆոլ Բլանշ Բ, ՈՒգնի Բլանք Բ խաղողի սորտերը, իսկ խաղողի օղու գինենյութերի արտադրության համար թույլատրված խաղողի սորտերի ցանկում` Շենին, Կոլոմբարդ-Բ, Ֆոլ Բլանշ Բ, ՈՒգնի Բլանք Բ սորտերը:

Նախագիծը մշակած` ՀՀ գյուղատնտեսության նախարարության հիմնավորմամբ, որոշման մեջ լրացումների նախագծի ընդունումը պայմանավորված է արգենտինացի ձեռնարկատեր Էդուարդո Էռնեկյանի կողմից Հայաստանում հիմնադրած «Տիեռաս դե Արմենիա» ՓԲԸ-ի գործունեությանը` մասնավորապես աճեցվող խաղողի բերքի իրացման գործում, աջակցություն ցուցաբերելու անհրաժեշտությամբ: Ընկերությունը դիմել է ՀՀ գյուղատնտեսության նախարարին վերոհիշյալ խաղողի սորտերը ցանկում ներառելու վերաբերյալ խնդրանքով:

Ըստ տեղեկանքի, «Տիեռաս դե Արմենիա» ՓԲԸ-ն իր գործունեությունը սկսել է 2004 թ.-ի նոյեմբեր ամսից, ձեռք է բերել շուրջ 2300 հա անմշակ հողատարածք և ընկերության զարգացման 15 տարիների ծրագրով նախատեսում է վերոհիշյալ հողատարածքի առնվազն 80%-ը դարձնել մշակովի: Ծրագրի շրջանակներում տնկվել է շուրջ 300 հա խաղողի այգի:

Ընկերության զարգացման ծրագրով խաղողի այգիների 95%-ը պետք է կազմեն հայկական կոնյակի համար նախատեսված խաղողի սորտերի, իսկ 5%-ը` սեղանի գինիների համար նախատեսված սորտերի խաղողի այգիները:

Համաձայն «Խաղողի հումքով ոգելից խմիչքների մասին» ՀՀ օրենքի` հայկական կոնյակի արտադրության համար թույլատրված սորտերի մեջ այլ սորտերի կշռային մասը չպետք է գերազանցի 5%-ը: Ընթացիկ և առաջիկա մի քանի տարիներին տվյալ սորտերից ակնկալվող բերքի քանակությունը կկազմի շուրջ 500 տոննա` հանրապետությունում տարեկան միջին հաշվով մթերվող խաղողի 1%-ից պակաս, ուստի վերը նշված խաղողի սորտերը կարող են մթերվել հայկական կոնյակի արտադրության նպատակով մթերվող թույլատրված այլ սորտերի հետ միասին` առանց հայկական կոնյակի որակական ցուցանիշների վրա բացասական ազդեցություն թողնելու: