Փաստ ինֆո

«Ներկրվող փափուկ խաղալիքները ինչպես օրինական, այնպես էլ անօրինական ճանապարհով են մուտք գործում Հայաստան և սա է պատճառը, որ հաճախ չեն անցնում համապատասխան ստուգում»,- «Փաստինֆո» լրատվական գործակալության թղթակցի հարցին, թե ներկրվող խաղալիքները օրինակա՞ն ճանապարհով են մուտք գործում Հայաստան, պատասխանեց «Սպառողի իրավունքների պաշտպանություն» հասարակական կազմակերպության փոխնախագահ Կարեն Չիլինգարյանը, հավելելով, որ եթե կան կասկածներ գնման պահին, սպառողը, կարող է պահանջել հավաստագրման սետիֆիկատ տվյալ խաղալիքների խմբաքանակի համար :
Ստացվում է, որ մեր երեխաների իրավունքները պաշտպանված չեն և նրանց առողջությանը վնաս չհասցնելու հարցում պետք է ապավինել որոշ տնտեսվարող սուբյեկտների գթասրտությանը:
Անհայտ ծագում ունեցող խաղալիքներն արդյո՞ք երեխաների առողջության համար վտանգավոր չեն:
Կարեն Չիլինգարյանի խոսքով՝ հիմնականում ապօրինի ճանապարհով ներկրվող խաղալիքներն են, որ անհայտ ծագում ունեն և թունավոր նյութեր են պարունակում իրենց բաղադրության մեջ, որոնք էլ կարող են երեխայի առողջությանը վնաս հասցնել:
Եղել են դեպքեր, որ անհայտ ծագում ունեցող փափուկ խաղալիքներից երեխաների մոտ ալերգիաներ կամ տարաբնույթ շնչառական հիվանդություններ են առաջացել, նշեց Կարեն Չիլինգարյանը, հավելելով, որ ծնողները հաճախ չեն դիմում համապատասխան մարմիններին՝ պարզելու համար դրանց վտանգավորության պաճառը: Նա խորհուրդ տվեց նման դեպքերում դիմել ՀՀ էկոնոմիկայի նախարարության շուկայի վերահսկողության պետական տեսչություն, որտեղ և կպարզվի՝ տվյալ խաղալիքը վնասակար նյութեր պարունակու՞մ է, թե ոչ:
Արդյո՞ք արտադրողի, կամ վաճառողի կողմից ապրանքի անվտանգությունը չապահովելու հետևանքով երեխայի կյանքին կամ առողջությանը հասցված վնասը ենթակա է հատուցման հարցին ի պատասխան Կարեն Չիլինգարյանը նշեց .«Եթե պարզվել է, որ այնուամենայնիվ դրանցում առկա են թունավոր նյութեր, որոնք երեխայի առողջությանը վնաս են հասցրել, ապա ծնողը իր երեխայի առողջությանը հասցված վնասի փոխհատուցման հայցով կարող է դիմել դատարան»: