Փաստ ինֆո

Քաղաքացի Գալուստ Շիրինյանի գործով ընդունված վերջնական դատական ակտը, նոր հանգամանքների հիմքով, ենթակա է վերանայման: Սահմանադրական դատարանը հուլիսի 18-ին, ելնելով քաղաքացի Գալուստ Շիրինյանի դիմումի հիման վրա գործի քննության արդյունքներից, որոշեց, որ քննության առարկա` Աշխատանքային օրենսգրքի 14-րդ հոդվածը համապատասխանում է ՀՀ Սահմանադրությանը:
Նշենք, որ դիմումատուն վիճարկում էր հիշյալ հոդվածի, մասնավորապես, աշխատանքային իրավահարաբերությունների ծագման համար աշխատանքային պայմանագրի առկայությունը անհրաժեշտ հիմք հանդիսանալու, սահմանադրականության հարցը:
ՍԴ-ի որոշման հաջորդ կետով արձանագրվեց, որ ՀՀ աշխատանքային օրենսգրքի 14-րդ և 102-րդ հոդվածների, ՀՀ քաղաքացիական օրենսգրքի 1-ին հոդվածի 4-րդ մասի, 298-րդ հոդվածի 1-ին մասի, ինչպես նաև ՀՀ-ի ստանձնած միջազգային պարտավորությունների համադրված վերլուծությունից բխում է, որ ՀՀ աշխատանքային օրենսգրքի 14-րդ հոդվածով չի բացառվել աշխատողի` իր փաստացի կատարած աշխատանքի դիմաց համարժեք հատուցում ստանալու իրավունքի դատական պաշտպանության հնարավորությունը:
Որոշման մեկ այլ կետով նշվում է, որ ՍԴ-ի մասին օրենքի համաձայն՝ քաղաքացի Գալուստ Շիրինյանի գործով ընդունված վերջնական դատական ակտը, նոր հանգամանքների հիմքով, օրենքով սահմանված կարգով ենթակա է վերանայման: ՍԴ-ի որոշումը վերջնական է և ուժի մեջ է մտնում հրապարակման պահից:
Ի դեպ` մինչև գործով որոշում կայացնելու համար խորհրդակցական սենյակ անցնելը ՍԴ նախագահ Գագիկ Հարությունյանը նշեց, որ իսկապես առկա է լուծման ենթակա խնդիր, երբ առանց պայմանագիր կնքելու «գործատուն ընդունել, աշխատեցրել է մարդուն, և մարդն էլ համաձայնվել, աշխատել է, և վերջում նա ոչ վարձատրվել է, ոչ էլ` փոխհատուցվել»:
«Կարծում եմ, որ Հայաստանի Հանրապետության համար այս խնդիրը շատ ավելի հրատապ է` պայմանավորված այն հանգամանքով, որ, մասնավորապես, ոչ պետական սեկտորում գործատուների մեծ մասը հակված է այսօր, աշխատատեղերի դեֆիցիտի պայմաններում, երբ աշխատողը գործի ընդունվելիս հաճախ պայմանների մեջ խտրականություն չի դնում, այս հանգամանքը չարաշահվում է և, ըստ էության, աշխատեցվում է առանց պատշաճ գրանցումների` խուսափելով նաև հարկերից և այլ վճարումներից»,-ընդգծեց Գ. Հարությունյանը` հավելելով. «Ստացվում է քողարկված աշխատուժի շահագործում»:
ՍԴ նախագահը նշեց նաև, որ ենթադրում էր, թե լրագրողները և, «այսպես կոչված, արհմիութենական ակտիվիստներ ՍԴ-ն պետք է պարզապես շրջապատած լինեին և փորձեին աշխատողների իրավունքի պաշտպանության ուղղությամբ որևէ քայլ անել»:
Ըստ Գ. Հարությունյանի, նման անտարբերությունն ինքը համարում է անթույլատրելի, աններելի: