Փաստ ինֆո

Երևանի Կենտրոն և Նորք-Մարաշ վարչական շրջանի առաջին ատյանի դատարանում՝ դատավոր Գագիկ Պողոսյանի նախագահությամբ, ՀԱԿ-ի երիտասարդ ակտիվիստների գործով սկսվեց դատական վիճաբանությունների փուլը:

Ամբաստանյալներ Տիգրան Առաքելյանը, Արտակ Կարապետյանը, Դավիթ Քիրամիջյանը և Սարգիս Գևորգյանը մեղադրվում են ոստիկանների հետ 2011թ. օգոստոսի 9-ի միջադեպի գործով:

Տիգրան Առաքելյանը մեղադրվում է ՀՀ քրեական օրենսգրքի 316 հոդվածի առաջին և երկրորդ մասերով՝ համապատասխանաբար իշխանության ներկայացուցչի նկատմամբ կյանքի և առողջության համար ոչ վտանգավոր և վտանգավոր բռնություն գործադրելը, 258 հոդվածի երրորդ մասի առաջին և երկրորդ կետերով՝ խուլիգանություն, որ կատարվել է մի խումբ անձանց կամ կազմակերպված խմբի կողմից և զուգորդվել իշխանության ներկայացուցչին դիմադրություն ցույց տալով: Հիշյալ խուլիգանության հոդվածով մեղադրվում են նաև ամբաստանյալներ Սարգիս Գեւորգյանը, Դավիթ Քիրամիջյանը և Արտակ Կարապետյանը: Վերջինս մեղադրվում է նաև Իշխանության ներկայացուցչի կյանքի ու առողջության համար ոչ վտանգավոր բռնություն գործադրելու մեջ: Ամբաստանյալներն իրենց մեղավոր չեն ճանաչել առաջադրված մեղադրանքում, հայտարարելով, որ իրենց մեղսագրվող արարքները հանցագործություն չեն:

Այդ պատճառով մեղադրող Հակոբ Մարտիրոսյանն իր մեղադրական ճառում հանգամանալից անդրադարձավ հասարակական կարգի կոպիտ խախտման, հանրության հանդեպ բացահայտ անհարգալից վերաբերմունքի, ինչպես նաև առաջադրված մեղադրանքի հոդվածների քրեաիրավական բնութագրումներին:

Ըստ մեղադրողի, ոստիկանները գործել են օրենքի, այդ թվում նաև՝ «Ոստիկանության մասին» օրենքի շրջանակներում, նրանց գործողություններն իրավաչափ ու օրինական են եղել, որևէ իրավախախտում թույլ չեն տվել, իսկ ամբաստանյալներն, ըստ նրա, դիմադրություն ցույց տվել, չեն կատարել ոստիկանների օրինական պահանջները, ավելին բռնություն են գործադրել նրանց հանդեպ՝ ոչ վտանգավոր ու վտանգավոր:

Մեղադրող Հակոբ Մարտիրոսյանը շուրջ 4 ժամ ներկայացրեց մեղադրական ճառը, ապա խնդրեց դատական նիստը հետաձգել մեկ այլ օրվան, քանի որ իր ինքնազգացողությունը լավ չէ: Դատարանը բավարարեց միջնորդությունը, և դատական նիստը հետաձգեց մինչև հուլիսի 14-ը: