Փաստ ինֆո

Կրթության և գիտության նախարար Արմեն Աշոտյանի գնահատմամբ, այս տարվա միասնական ընդունելության քննություններն աննախադեպ հանդարտ են ընթանում: «Դժգոհությունների, լարվածության չափաբաժինը կտրուկ նվազել է: Ես չեմ ասում, որ անցկացնում ենք իդեալական քննություններ, այլ ասում եմ, որ դրանք այս տարի համեմատաբար առավել «դիմորդամետ» են: «Հայոց լեզու և գրականություն» ու «Մաթեմատիկա» առարկաների ընդունելության քննությունները անցկացվեցին շտեմարանային եղանակով, այսինքն՝ դրանք նախապես կանխատեսելի էին»,- հուլիսի 3-ին նշել է ԵՊՀ-ում տեղակայված քննակենտրոն այցելած նախարարը` հավելելով, որ շտեմարանային մեթոդը հաջորդ տարվանից կկիրառվի նաև մյուս առարկաների համար: 

Ըստ Ա.Աշոտյանի, թեստերի հետ կապված զանգվածային դժգոհություններ, բողոքներ չեն եղել: «Քննական թեստի դժվարությունը բացասական երևույթ չէ. թեստերը պետք է ներառեն ճիշտ և հավասարակշռված ծանրությամբ առաջադրանքների խումբ: Իհարկե, բարդ հարցեր ևս պետք է լինեն»,-ասել է նա: Ինչ վերաբերում է թեստերի վերաբերյալ որոշ քննադատություններին, ապա դրանք, ըստ նախարարի, հիմնականում պայմանավորված են մասնագիտական մոտեցումների տարբերությամբ: Նշվել է նաև, որ արդեն մեկնարկել են բուհերի բանավոր քննությունները և առարկայական համապատասխան հանձնաժողովներին հանձնարարվել է աշխատել առավելագույն օբյեկտիվության սկզբունքով: 

«Վստահ եմ, որ այս տարվա քննությունները պատմության մեջ կմնան իբրև ամենաարդար, ամենահանգիստ, ամենաօբյեկտիվ քննություններից մեկը»,- նշել է Ա.Աշոտյանը: Նա ընդգծել է նաև, որ լուծված է համարում որպես նախարար իր առջև դրված կարևոր խնդիրը, այն է՝ քննությունները հայ հասարակության համար դարձնել սովորական երևույթ, և հասարակությունը երկուսուկես ամիս «չապրի» քննություններով: