Փաստ ինֆո

Հունիսի 20-ի դրությամբ, նորաստեղծ Փաստաբանական դպրոցում ուսուցման դասընթաց անցնելու համար դիմել է 35 հոգի: Ինչպես «Փաստինֆո» գործակալության թղթակցի հետ զրույցում նշեց Փաստաբանական դպրոցի տնօրեն, փաստաբան Նիկոլայ Բաղդասարյանը, Փաստաբանական դպրոցը նախատեսում է անցկացնել մինչև 60 ունկնդրի համար ուսուցում:

Փաստաբանական դպրոցում կարող են ուսուցում ստանալ բակալավրիատն ավարտած կամ դիպլոմավոր մասնագետ իրավաբաններ: Ն.Բաղդասարյանը բացառում է կոռուպցիայի հնարավորությունը, քանի որ «մարդկային գործոնը հավասար է զրոյի»: Թեստային համակարգով անցկացվող ընդունելության քննությունների ժամանակ համակարգիչն է ընտրում ամեն հավակնորդի համար 150 հարցաթերթերը՝ 2400 հարցաթերթից /ունկնդիրը ընտրում է միայն իրավունքի տեսակը՝ քրեական կամ քաղաքացիական/: Համակարգիչն է կատարում նաև ունկնդրի պատասխանների գնահատումը, առնվազն 120 հարցաթերթերին ճիշտ պատասխանելու դեպքում հավակնորդը հնարավորություն է ստանում մասնակցել մրցույթին, որում կհաղթեն առավելագույն նիշեր հավաքած 60 ունկնդիրներ: Դպրոցի տնօրենը վստահ է, որ ունկնդիրների 90 տոկոսից ավելին կհանձնեն որակավորման քննություններն ու կդառնան փաստաբաններ:

Դասընթացի նպատակն է մի քանի նիշով բարձրացնել և եվրոպական չափանիշներին համապատասխան գիտելիքներ տալ ունկնդիրներին, ովքեր, մասնավորապես, կսովորեն ինչպես է պտք կազմել վճռաբեկ բողոքը, ինչպես պետք է խոսի եւ ինչ ժեստեր օգտագործի փաստաբանը, ինչպես պետք է շփվի լրագրողների հետ, ասուլիս կազմակերպի, մամուլի հաղորդագրություն կազմի եւ այլն: Ունկնդիրը փաստաբանի համար անհրաժեշտ հմտություններ ձեռք կբերի, այդ թվում՝ դատախաղերի միջոցով:

Ընդ որում, 5 և ավելի տարվա մասնագիտական ստաժ ունեցող անձանց համար ուսուցումը կտեւի 6 ամիս, այդպիսի ստաժ չունեցող անձանց համար՝ մեկ տարի: Յուրաքանչյուր ունկնդրից ուսուցման համար կգանձվի 400 հազար դրամ գումար:

Փաստաբանական դպրոցի ռազմավարական խնդիրներից է նաև, ըստ Ն.Բաղդասարյանի, գործող փաստաբանների վերապատրաստումը: Ըստ մշակված ուսումնական ծրագրերի, յուրաքանչյուր փաստաբան պարտավոր է ամեն տարի անցնել 24-ժամյա վերապատրաստում՝ 4 օր վերապատրաստում 6-ական ժամով: Շեշտը դրվում է Փաստաբանների վարքագծի կանոնների պահպանման, Իրավունքի եվրոպական կոնվենցիային առնչվող առարկաների դասընթացներին մասնակցելու վրա: