Փաստ ինֆո

ՀՀ արդարադատության նախարարության քրեակատարողական հիմնարկների վարչության նախկին պետ Ս. Հովհաննիսյանին 2012 թվականի հունիսի 15-ին մեղադրանք է առաջադրվել ՀՀ քրեական օրենսգրքի 38-35-104-րդ հոդվածի 2-րդ մասի 7-րդ եւ 8-րդ կետերով՝ մի խումբ անձանց կողմից շահադիտական դրդումներով և պատվերով սպանություն նախապատրաստելու համար: Ինչպես հայտնի դարձավ «Փաստինֆո» գործակալությանը՝ քննիչը դատարան միջնորդություն է ներկայացրել Ս.Հովհաննիսյանի նկատմամբ որպես խափանման միջոց կալանավորումը կիրառելու վերաբերյալ:

Քննությանը մոտ կանգնած աղբյուրների տեղեկացմամբ՝ ՔԿՀ վարչության նախկին պետը մասնավորապես մեղադրվում է դատապարտյալ Ջամալ Սլոյանի սպանությունը նախապատրաստելու համար: Ս.Հովհաննիսյանը, ըստ մեղադրանքի, պարտավորվել է գտնել սպանությունն անմիջական իրականացնող անձ և դառնալ միջնորդ նրա և բուն պատվիրատուի միջև: Նախկինում երկու անգամ դատապարտված իր ծանոթի միջոցով Ս.Հովհաննիսյանը գտել է մեկ այլ դատապարտյալի, ով պատրաստակամություն է հայտնել համապատասխան վարձատրության դիմաց իրականացնել Սլոյանի սպանությունը: Վերջինս ներկայումս իր պատիժը կրում է «Արթիկ» քրեակատարողական հիմնարկում, ուր տեղափոխվել է «Գորիս» քրեակատարողական հիմնարկից:

Նախաքննական մարմնին հայտնի է ինչպես սպանության իրագործումը ստանձնած դատապարտյալի, այնպես էլ նրա և Ս.Հովհաննիսյանի միջև միջնորդ դարձած անձի տվյալները, ինչպես նաև թե ինչ եղանակով է նախապատրաստվել դատապարտյալ Սլոյանի սպանության իրագործումը: Մեր ունեցած տեղեկություններով՝ Ս.Հովհաննիսյանին առաջադրված մեղադրանքում խոսքը գնում է «Դատապարտյալների հիվանդանոց» ՔԿՀ-ում բաց ռեժիմով պատիժը կրող դատապարտյալ Ա. Խուրշուդյանի հետ ունեցած համաձայնության մասին, ով համաձայնել է կատարել պատիժը կրելու համար «Արթիկ» քրեակատարողական հիմնարկ տեղափոխված Ջ. Սլոյանի սպանությունը` վերջինիս ուղարկվող թմրանյութը մահաբեր խտության աստիճանի հասցնելու և դրանով իսկ թունավորումն իրականացնելու եղանակով: Նույն աղբյուրի համաձայն՝ Խուրշուդյանին անգամ հատկացված է եղել կանխավճար՝ անհրաժեշտ ծախսերը կատարելու համար: