Փաստ ինֆո

Հունիսի 5-ին Սահմանադրական դատարանը գրավոր ընթացակարգով կսկսի ՀՀ Ազգային ժողովի մեծամասնական ընտրակարգով Սյունիքի մարզի թիվ 37 ընտրատարածքում պատգամավորի նախկին թեկնածու Սամվել Հարությունյանի դիմումի հիման վրա գործի դատաքննությունը: Դիմումատուն վիճարկում է համապատասխան ընտրատարածքային ընտրական հանձնաժողովի կողմից Ազգային ժողովի մայիսի 6-ին անցկացված մեծամասնական ընտրակարգով պատգամավորի ընտրության արդյունքներով մայիսի 11-ին ընդունված որոշումը։

Գործով զեկուցող է նշանակված ՍԴ անդամ Վալերի Պողոսյանը: Պատասխանող կողմն ընտրությունների արդյունքներն ամփոփած թիվ 37 ԸԸՀ-ն է:

Ըստ թ.37 ԸԸՀ որոշման, տվյալ ընտրատարածքից ԱԺ պատգամավոր է ընտրվել ՀՀԿ անդամ Հայկ Գրիգորյանը:

Ամփոփիչ արձանագրության համաձայն, Հ.Գրիգորյանի օգտին քվեարկել է 19 894 ընտրող: Մյուս` ինքնաառաջադրված անկուսակցական 3 թեկնածուների միջեւ քվեները բաշխվել են հետեւյալ կերպ. Թաթուլ Հակոբյան` 11 822, Սամվել Հարությունյան` 1 492, Վարազդատ Վարդազարյան` 1 190:

54 028 ընտրողների ընդհանուր թվից քվեարկությանը մասնակցել են 35 741-ը: 1 104 քվեաթերթիկ ճանաչվել է անվավեր: Անճշտությունների չափը 25 է:

Գրավոր ընթացակարգով դատաքննության ժամանակ կողմերն իրենց բացատրությունները, միջնորդությունները, առաջարկությունները ներկայացնում են գրավոր ՍԴ-ի սահմանած ժամկետներում, եւ գործի նյութերին ծանոթանում մինչեւ գործի դատաքննության սկսվելը: Գրավոր ընթացակարգով դատական նիստին կողմերը եւ դատաքննության այլ մասնակիցները կարող են ներկա չգտնվել: Դատական նիստին ներկայացած դատաքննության մասնակիցն տեղ է զբաղեցնում դահլիճում եւ նիստն ունկնդրում նիստին ներկա այլ անձանց համար սահմանված կարգով:

ՍԴ կանոնակարգի համաձայն, հայտարարված ժամին նիստը նախագահողը բացում է այն եւ հայտարարում դատաքննության ենթակա գործը, ինչից հետո ՍԴ անդամների կողմից կարող են հարցեր տրվել գործով զեկուցողին: Այնուհետեւ գրավոր դատաքննությունն ընթանում է Սահմանադրական դատարանի անդամների կողմից պարզաբանման կարիք պահանջող իրավական հարցերի վերաբերյալ կարծիքների փոխանակման եղանակով:

ՍԴ-ի անդամների` դատական նիստին ներկայացված միջնորդությունները քննարկվում եւ լուծվում են անհապաղ: Նիստը նախագահողը պարզում է դրանց քննարկման արդյունքում կամ նպատակով գործի դատաքննությունը կասեցնելու, դատական նիստն ընդմիջելու կամ հետաձգելու անհրաժեշտությունը եւ համապատասխան հարցը ներկայացնում է ՍԴ-ի քննարկմանը կամ հայտարարում ընդմիջում` այդ հարցը խորհրդակցական սենյակում լուծելու համար:

Կարծիքների փոխանակումից հետո նիստը նախագահողը քննարկման է դնում դռնփակ խորհրդակցության անցնելու հարցը: Առարկությունների բացակայության դեպքում ՍԴ-ն անցնում է դռնփակ խորհրդակցության` գործով որոշում ընդունելու համար:

Գրավոր ընթացակարգով քննված գործով ընդունված որոշումը հրապարակվում է դատական նիստում և առաքվում ու հրատարակվում ՍԴ-ի մասին օրենքով և ՍԴ կանոնակարգով սահմանված կարգերով: