Փաստ ինֆո

Մոր կողմից իր 6 ամսական երեխային աշխատանքային շահագործման հանձնելու գործով անմեղսունակ ճանաչված ամբաստանյալ Լուսիկը դատարանի որոշմամբ ազատվեց քրեական պատասխանատվությունից և պատժից:

Էրեբունի և Նուբարաշեն վարչական շրջանների ընդհանուր իրավասության դատարանի որոշմամբ Լուսիկի նկատմամբ կկիրառվի  բժշկական բնույթի հարկադրանքի միջոց՝  նա կստանա արտահիվանդանոցային հսկողության հարկադիր բուժում  հոգեբույժի մոտ:

Ամբաստանյալին քրեական պատասխանատվությունից ազատելու որոշումը կայացվել է մեղադրող Արմեն Մարուխյանի միջնորդության հիման վրա:

Այսօրվա նիստում մեղադրողը հրապարակեց մեղադրական եզրակացությունը, ըստ որի Լուսինեն և Լուսիկը 2011 թվականի սեպտեմբերին ծնված Լուսինեի որդուն 2012թ. փետրվարից մինչև 2013թ. հունիսի 11-ն ընկած ժամանակահատվածում «դրել և պահել են ստրկությանը հավասարազոր` աշխատանքի վատթարագույն՝ մուրացկանության շահագործման վիճակում»:

Ամեն օր՝ ժամը 14:00-ից մինչ երեկո,  մայրը երեխային հանձնել է Լուսիկին, իսկ վերջինս էլ Երևան քաղաքի Տիգրան Մեծ փողոցում գտնվող «Սթար» սուպերմարկետի մոտ նրան գրկում պահելով՝  երեխայի առկայության հանգամանքով քաղաքացիների խղճահարությունը հարուցելով, զբաղվել է մուրացկանությամբ: Լուսինեն ու Լուսիկն օրական վաստակած 4.000-ից 6.000 ՀՀ դրամ գումարներն ուղղել են իրենց առօրյա կարիքները հոգալուն:

Երեխայի մորը և Լուսիկին մեղադրանք է առաջադրվել ՀՀ քրեական օրենսգրքի 132.2-րդ հոդվածի 2-րդ մասի 2-րդ կետով՝ մի խումբ անձանց կողմից նախնական համաձայնությամբ երեխայի թրաֆիքինգը կամ շահագործումը:  Գործով երկու ամբաստանյալներն էլ  նախաքննության ընթացքում  կատարված փորձաքննության համաձայն,  ճանաչվել էին  սահմանափակ մեղսունակ, սակայն դատաքննության ընթացքում դատահոգեբուժական և դատահոգեբանական համալիր փորձաքննության եզրակացությամբ ճանաչվել են անմեղսունակ:

Մեղադրողը գտնում է, որ Լուսիկը կատարել է հանրորեն վտանգավոր արարք, սակայն ուսումնասիրելով գործով ձեռք բերված ապացույցները՝  մեղադրողն արձանագրեց, որ Լուսիկը արարքը կատարելու պահին և ներկայումս ևս գտնվել և գտնվում է անմեղսունակության վիճակում, որը զրկել և զրկում է իր գործողությունների վտանգավորությունը գիտակցելու և այդ գործողությունները ղեկավարելու ունակությունից:

Ուստի և մեղադրողը միջնորդեց ազատել նրան քրեական պատասխանատվությունից և պատժից՝ նրա նկատմամբ կիրառելով բժշկական բնույթի հարկադրական միջոց՝ պարտադիր բուժում հատուկ հսկողություն հոգեբուժական բաժանմունքում:

Ամբաստանյալ Լուսիկն էլ դատարանին խնդրեց, որ տան պայմաններում բուժումը շարունակի: