Փաստ ինֆո

ՀՀ քրեական օրենսգրքի 2 հոդվածներով մեղադրվող 58-ամյա Հերիքնազ Ղազարյանը Շենգավիթ վարչական շրջանի ընդհանուր իրավասության դատարանի դատավճռով՝ նախագահությամբ Ալեքսանդր Ազարյանի, արդարացվել է մասնակի:

Հերիքնազ Ղազարյանն առանձնապես խոշոր չափերի խարդախության մեղադրանքում արդարացվել է, սակայն մեղավոր ճանաչվել խոշոր չափերով խարդախության համար` դատապարտվելով՝ 4,5 տարվա ազատազրկման և տուգանքի` 500 000 ՀՀ դրամի չափով:
 
Ըստ մեղադրանքի՝ Հերիքնազ Ղազարյանը ուրիշի գույքը խարդախությամբ հափշտակելու դիտավորությամբ 2011թ մայիսի 1-ին, չարաշահելով Գայանե Պետրոսյանի վստահությունը եւ որպես երաշխիք ցույց տալով իրեն պատկանող Գ Նժդեհի փողոցի 19-րդ շենքի 207 և 208 բնակարանների սեփականության վկայականները, շինարարական բիզնես իրականացնելու պատրվակով նրանից վերցրել է 20 000 ԱՄՆ դոլար: Ապա`  նվիրատվությամբ օտարելով իր բնակարանները, հափշտակել է նշված գումարը` Գ Պետրոսյանին պատճառելով առանձնապես խոշոր չափերի հասնող գույքային վնաս:

Բացի այդ, Հերիքնազ Ղազարյանը, ուրիշի գույքը խարդախությամբ հափշտակելու դիտավորությամբ Գայանե Պետրոսյանի որդուն` Տիգրան Պետրոսյանին ԱՄՆ դեսպանատանը որպես վարորդ աշխատանքի ընդունելու պատրվակով, Երևան քաղաքի «Ռոսիա» կինոթատրոնի մոտակայքում 2011թ մայիսին  Գ Պետրոսյանից վերցրել է 2000 ԱՄՆ դոլար գումար և հափշտակել:  Հերիքնազ Ղազարյանին մեղադրանք է առաջադրվել ՀՀ քրեական օրենսգրքի  178-րդ հոդվածի 3-րդ մասի 1-ին կետով և 178-րդ հոդվածի 2-րդ մասի 2-րդ կետով, նրա նկատմամբ որպես խափանման միջոց է ընտրվել կալանավորումը: Առաջադրված մեղադրանքում ամբաստանյալն իրեն մեղավոր չի ճանաչել:

Դատարանը, գնահատելով գործով ձեռք բերված և դատաքննությամբ հետազոտված ապացույցները, հաստատված է համարել, որ Հերիքնազ Ղազարյանը ուրիշի գույքը  խարդախությամբ հափշտակելու դիտավորությամբ Գայանե Պետրոսյանի որդուն` Տիգրան Պետրոսյանին, ԱՄՆ-ի դեսպանատանն աշխատանքի տեղավորելու պատրվակով նրանից վերցրել է  2 000 ԱՄՆ դոլար:

Միևնույն ժամանակ դատարանը հետազոտելով և վերլուծելով ապացույցները, հանգել է հետևության, որ ամբաստանյալի գործողություններում բացակայում է ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցակազմը: Խոսքը գնում է 20.000 դոլարի հափշտակության մեղադրանքի մասին:

Մասնավորապես` դատարանի գնահատմամբ` դատաքննությամբ հետազոտված ապացույցները վկայում են, որ Հերիքնազ Ղազարյանն իրեն պատկանող բնակարանների սեփականության վկայականները ցույց է տվել ոչ թե գումարն ստանալուց առաջ, այլ հետագայում, երբ պահանջատերերն սկսել են նրանից պահանջել են տված գումարները։

Այսինքն, դատաքննությամբ չի հիմնավորվել նախաքննական մարմնի այն պնդումը, որ բնակարանների սեփականության վկայականներն ի ցույց դնելը երաշխիք է հանդիսացել Պետրոսյանների կողմից ամբաստանյալին գումար տալու համար։

Դատարանն արձանագրել է, որ ձեռք չի բերվել որևէ փաստական տվյալ, որով կհիմնավորվեր այն հանգամանքը, որ Հերիքնազ Ղազարյանը խաբել կամ մոլորության մեջ է գցել Պետրոսյաններին, ինչի արդյունքում իրավունք է ձեռք բերել նրանց 20.000 ԱՄՆ դոլարի նկատմամբ։

Այսինքն, չի հիմնավորվել Հերիքնազ Ղազարյանի արարքում խարդախության հանցակազմի օբյեկտիվ կողմի առկայությունը:

Բացի այդ, հետազոտված ապացույցներով չի հիմնավորվել ամբաստանյալի կողմից 20.000 ԱՄՆ դոլար հափշտակելու ուղղակի դիտավորության և շահադիտական նպատակ ունենալու հանգամանքը։ Հետեւապես` չի հիմնավորվել նաև նրա արարքում խարդախության հանցակազմի սուբյեկտիվ կողմի առկայությունը։

Նշենք, որ տուժող Գայանե Պետրոսյանի կողմից ներկայացված 22.000 ԱՄՆ դոլար քաղհայցի պահանջը դատարանը բավարարել է մասնակիորեն, ամբաստանյալ Հերիքնազ Ղազարյանից հօգուտ տուժողի կբռնագանձվի 2 000 ԱՄՆ դոլարին համարժեք դրամ։