Փաստ ինֆո

 «Բաղրամյան պողոտան մենք չենք բացելու, քանի դեռ մեր պահանջները բավարարված չեն: Շարունակում ենք մեր խաղաղ պայքարը: Անցնում ենք վճռական փուլ», - քիչ առաջ Բաղրամյան պողոտայում հայտարարեց նոր նախաձեռնող խմբի հանրային կապերի պատասխանատու Դավիթ Սանասարյանը` հայտարարելով, որ իշխանություններին ներկայացված վերջնաժամկետը հուլիսի 6-ի ժամը` 21-ն է: Նա միաժամանակ նշեց, որ բոլոր քայլերը քննարկվելու եւ համաձայնեցվելու են Բաղրամյան պողոտայում հավաքված քաղաքացիների հետ, բայց ոչ` քաղաքացիական հագուստով ոստիկանների:

Դավիթ Սանասարյանի հրապարակած հայտարարության մեջ մասնավորապես ասվում է.

«Հայաստանի Հանրապետության արժանապատիվ քաղաքացիներ: Շուրջ երկու շաբաթ է ինչ մենք փողոցում ենք հանուն Հայաստանի վաղվա օրվա ու հայտարարում ենք, որ կանգնելու ենք մինչև հաղթանակ:
Այս օրերին իշխանությունները ուժ կիրառեցին, փորձեցին արժեզրկել շարժումը: Փորձեցին վախեցնել քաղաքացուն, որոշ դեպքերում հաջողեցին: Բայց ՀՀ քաղաքացին կանգնած է ու պատրաստ վճռական քայլերի: Այս օրերին տարատեսակ մեղադրանքներ են հնչեցնում, որոնց մի մասի հետ համաձայն եմ:

Այսօր մեր քայլերը որոշելու են ՀՀ քաղաքացիները: Դիմում եմ բոլորին. խենթ երիտասարդներից մինչև իմաստուն ավագ սերունդ: Մենք պարտավոր ենք քայլեր իրականացնել խաղաղ, բայց իշխանությանը մարտահրավեր նետող:

Հակառակ դեպքում կմնանք քչերով, և դա է իշխանության ուզածը: Այսօր դիմում եմ նրանց, ովքեր իրենց պատասխանը գտան Սերժ Սարգսյանի հայտարարության մեջ ու չեկան Բաղրամյան: Ովքեր կարծեցին, թե պայքարը մարում է, նրանց, ովքեր փորձում են ցրել գաղջ մթնոլորտը: Ուզում եմ դիմել այն մտավորականներին, ովքեր կանգնել են մեր կողքին: Այսօր ամբողջ աշխարհն է մեզ հետևում: Եկեղեցին իշխանությանը չէ, ցույց տվեք, որ դուք պահանջատեր ժողովրդի կողքին եք:

Այսօր մենք մարտի դուրս չենք եկել: Շարունակում ենք մեր խաղաղ պայքարը: Անցնում ենք վճռական փուլ: Դիմում ենք իշխանություններին Բաղրամյան պողոտան մենք չենք բացելու, քանի դեռ մեր պահանջները բավարարված չեն:

Եվ դրա համար սպասում ենք մինչև երկուշաբթի ժամը 21:00-ն, և եթե մեր պահանջներից գոնե մեկը չկատարվի ուրեմն սկսում ենք մեկ քայլ առաջ բողոքի ակցիան»:

Դ.Սանասարյանը հայտարարեց, որ պահանջները մնում են նույնը`վերանայել և չեղյալ հայտարարել ՀԾԿՀ-ի կողմից ապօրինի կայացրած հոսանքի սակագնի որոշումը,  անցած տարվա սակագինը՝ նվազեցման նպատակով, պատժել բոլոր այն կարգազանց ոստիկաններին, ովքեր անօրինական կերպով հունիսի 23-ի առավոտյան բռնություններ գործադրեցին:

Հայտարարությանը հաջորդեցին «Ազատ, անկախ Հայաստան» վանկարկումները: