Փաստ ինֆո

ՀՀ Շիրակի մարզի ընդհանուր իրավասության դատարանը՝ դատավոր Մարտին Սարոյանի նախագահությամբ, դրամանենգության մեջ մեղադրվող Մկրտիչ Զիլֆիմյանին և Բագրատ Հարությունյանին դատապարտել է  համապատասխանաբար 6,5 և  6 տարվա ազատազրկման: Դատարանն այսպիսով նրանց մեղավոր է ճանաչել ՀՀ քրեական օրենսգրքի 202-րդ  հոդվածի 2-րդ մասի 2-րդ կետով` մի խումբ անձանց կողմից նախնական համաձայնությամբ կեղծ փողեր կամ արժեթղթեր պատրաստելու պահելու կամ իրացնելու համար առաջադրված մեղադրանքում:

Դատարանը պարզել է, որ  Բ.  Հարությունյանը և Մ.  Զիլֆիմյանը 12  հատ կեղծ  20 հազարանոց թղթադրամներով Շիրակի մարզի մի քանի գյուղերի բնակիչներից «գնել են» 4 գլուխ գառ և  2 գլուխ ոչխար՝ պատճառելով գյուղացիներին ընդհանուր առմամբ 240 հազար դրամի վնաս: Մ. Զիլֆիմյանը և Բ. Հարությունյանը գունավոր տպիչով պատճենահանել են նաև կեղծ 1 հատ ՀՀ 10.000 և 34 հատ 5.000 դրամանոց թղթադրամներ, որոնք «իրացրել են» տարբեր վաճառատներում՝  դրանց տերերին պատճառելով զգալի չափի նյութական վնաս:

Ամբաստանյալներ Մկրտիչ Զիլֆիմյանը և Բագրատ Հարությունյանը նախաքննության ընթացքում իրենց մեղավոր չեն ճանաչել, սակայն դատարանում իրենց մեղավոր են ճանաչել լիովին, ընդունել են մեղքը և զղջացել կատարածի համար: Մինչ դատաքննություն սկսելը նրանք միջնորդել են դատաքննությունն անցկացնել արագացված կարգով, դատարանը բավարարել է միջնորդությունը:

Պատիժ սահմանելիս դատարանը հաշվի է առել, որ Մկրտիչ  Զիլֆիմյանը ֆիզիկապես վատառողջ է, երրորդ խմբի հաշմանդամ է,  մեղքը ընդունել  և զղջացել է կատարածի համար, և որ Բագրատ  Հարությունյանը նախկինում դատված չի եղել, բնութագրվել է դրական, խնամքին ունի երկու մանկահասակ երեխաներ, մեղքը ընդունել  և զղջացել է կատարածի համար: Չնայած տուժողներին պատճառված վնասը վերականգնված չէ, սակայն նրանք հրաժարվել են այդ գումարներից: Դատավճռով նրանց ի պահ հանձնված  4 գլուխ գառները և մեկ գլուխ ոչխարը թողնվել է տուժողների տնօրինությանը:

Դատավճիռը պատժաչափի մասով  մինչև հունվարի 27-ը կարող է բողոքարկվել ՀՀ վերաքննիչ քրեական դատարան:

Հեղինակ` Սոնա Մաշուրյան