Փաստ ինֆո

«Մանանա Գրեյն» ՍՊ ընկերությանը պատկանող առանձնապես խոշոր չափի գույքի գաղտնի հափշտակության գործով ամբաստանյալ Աշոտ Առուշանյանի պաշտպան Լիպարիտ Սիմոնյանը մոտակա օրերին բողոք կներկայացնի Վճռաբեկ դատարան, ապա նաև՝ Մարդու իրավունքների եվրոպական դատարան:

Լրագրողների հետ այսօրվա հանդիպմանը պաշտպանը համոզմունք հայտնեց, որ, միևնույն է, Աշոտ Առուշանյանն արդարացվելու է՝ մեկ ամիս, հինգ թե տասը տարի հետո, այն պարզ պատճառով, որ նա անմեղ է:

Լ.Սիմոնյանը նշեց, որ Վերաքննիչ դատարանը թեև շատ երկար՝ երեք-չորս ամիս, քննեց իրենց վերաքննիչ բողոքները, սակայն ինքն էլ խախտումներ թույլ տվեց՝ դուրս գալով իր լիազորությունների սահմաններից: Մասնավորապես, վերադաս դատարանն անդրադարձավ մեղադրողի միջնորդությանը գործով նախաքննության ընթացքում ինքնասպանություն գործած մեղադրյալ Արտաշես Գալուստյանի ցուցմունքն ու Աշոտ Առուշանյանի հետ  նրա առերես հարցաքննության արձանագրությունն անթույլատրելի ճանաչելու հարցին, թեև դա դուրս էր բողոքների շրջանակից:

Առաջին ատյանի դատարանի դատավճռով՝ դրանք անթույլատրելի էին ճանաչվել, սակայն որակվել՝ որպես հիմնավոր վարկած և ապացույցների համակցությամբ դրվել դատավճռի հիմքում:

Վերաքննիչ դատարանը գտել էր, որ առաջին ատյանի դատարանը սխալ է վարվել անթույլատրելի ճանաչելով հիշյալ երկու ապացույցները:

Վերադաս դատարանը ոչ թե պետք է փոփոխեր դիրքորոշումը և թույլատրելի ճանաչեր այդ ապացույցները, այլ այդ մասով դատավճիռը պետք է բեկաներ ու ուղարկեր նույն դատարան՝ նոր քննության:

Վերաքննիչ դատարան հրավիրվեց գործը քննող քննիչ Մուշեղ Ալեքսանյանը, սակայն, ըստ Լ.Սիմոնյանի, անհասկանալի բան տեղի ունեցավ. դատարանը պաշտպանական կողմի   հարցերը հանում էր՝  հայտարարելով՝ ծառայողական քննություն եք անցկացնում՝ թեև քննիչը դատարանում կարող է հարցաքննվել թույլ տրված խախտումների հետ կապված:

Իսկ այն հարցերը, որոնք թողնվում էին, մնում էին անպատասխան՝ քննիչը հայտարարում էր՝  «չեմ պատասխանում», «լավ եմ արել», անգամ, պաշտպանական կողմի գնահատմամբ, սուտ ցուցմունք տվեց՝ հայտարարելով, որ մեղադրյալ Արտաշես Գալուստյանի հոր հեռախոսազանգին պատասխանել է իր ընկերը: Մինչդեռ, ըստ գործի տվյալների, քննիչն ինքն է զանգահարել մեղադրյալի հորը:  Վերաքննիչ դատարանն, ի դեպ,  իր որոշման մեջ ոչ մի բառով չի անդրադարձել քննիչի հարցաքննությանը:  

Լիպարիտ Սիմոնյանը ուշադրություն հրավիրեց նաև դեպքի օրը երեք կազմակերպություններից պահանջված տեսաձայնագրությունների վրա, ըստ փորձագետի, դրանցում առկա են կտրատումներ, դրանցում, ի դեպ, տեղ չեն գտել, տուժողի ներկայացուցչի գործողությունները:  Ըստ Աշոտ Առուշանյանի հոր՝   Լավրենտի Առուշանյանի, դեպքի մասին նախնական վարկածն եղել է՝  «գողության իմիտացիա, փողերի լվացում»:

«Եթե մինչև այսօր գողոն չի հայտնաբերվել, միգուցե գողոն չի եղել»,- ասաց ամբաստանյալի հայրը՝ տեղեկացնելով, որ բողոք է ներկայացրել ՀՀ գլխավոր դատախազին՝ քննիչ Մուշեղ Ալեքսանյանի, դատախազ Տիտալ Ուզոյանի ու ոստիկանության աշխատակիցների դեմ  քրեական  գործ հարուցելու պահանջով:

Լ.Առուշանյանը հայտնեց նաև, որ Նոր տարուց հետո մտադիր են ամբողջ գերդաստանով անժամկետ հացադուլի դիմել՝ մինչև որ ՀՀ նախագահը կընդունի ու կլսի իրենց, թե «ովքեր են կանգնած անօրինությունների հետևում»:

Լավրենտի Առուշանյանը նշեց, որ իր որդին անմեղ է, նա 22 տարեկանում արդեն երկու համալսարան էր ավարտել, կարող էր արտերկրում մնալ ու աշխատել, սակայն գերադասեց իր Հայրենիքին օգտակար լինել՝ որպես տնտեսագետ, ձերբակալվելուց մեկ շաբաթ անց պետք է գիտական թեզ պաշտպաներ, իսկ 20 օր անց՝ ամուսնանար:  

Հիշեցնենք, որ գործը երկու դատաքննություն է անցել, երկրորդ դատաքննության արդյունքում էլ կայացվել էր մեղադրական դատավճիռ. Աշոտ Առուշանյանը մեղավոր էր ճանաչվել ՀՀ քրեական օրենսգրքի 38-177-րդ հոդվածի 3-րդ մասի 1-ին կետով՝ առանձնապես խոշոր չափերի գույքի հափշտակությանն օժանդակելը, և դատապարտվել 5 տարի 6 ամսվա ազատազրկման՝ առանց գույքի բռնագրավման: Իսկ ամբաստանյալ Էդգար Կարաքեշիշյանը մեղավոր էր ճանաչվել ՀՀ քրեական օրենսգրքի 177-րդ հոդվածի 3-րդ մասի առաջին կետով և դատապարտվել 7 տարվա ազատազրկման:
 
Դատարանը միաժամանակ բավարարել էր քաղհայցը. ամբաստանյալներից համապարտության կարգով հօգուտ «Մանանա-Գրեյն» ՍՊԸ-ի պետք է բռնագանձվի  55մլն. 500 հազար ՀՀ դրամ՝ որպես հանցագործությամբ ընկերությանը պատճառված վնասի հատուցում: